Rai ki Rangbah Shnong Ri Bhoi, ban nym iatreilang shuh bad ka Sorkar

Shillong, 22 ‘lyngkot:
Ka Synjuk jong ki Rangbah Shnong jong ka Ri Bhoi District, ka la rai ba kan nym ia trei lang shuh bad ka sorkar, ha ki kam bapher, kiba ka sorkar, ka don jingiadei bad ki paidbah, kaba kynthup ruh, ia kaba ki paidbah nongshong shnong, ba kin nym leit rung shuh sha ki ophis sorkar bad leit wad jingiarap na kitei ki tnat sorkar bapher.
Ki lad khubor, ki iathuh ba ka jingialang jong ka Synjuk, kaba la long ha ka 19tarik mynta u bnai, ka la shim ia ka rai ba kan sam ia ki kot lyngkdop sha ki paidbah, halor ki jing ia tyngkhuh [bteng sla 7]
jong ki dorbar shnong ha kine ki sngi bad hadien kata, kin sa pynlong ia ka jingialang paidbah ha Madan Pahamsyiem, Nongpoh, ha ka taiew kaba ar jong u bnai Rymphang bad hangtei kin shim ia ka rai ha ryngkat bad u paidlang jong ka Ri Bhoi.
Ka rai jong ki dorbar Shnong, hi ka long beit ba kin sangeh lut ban ia treilang ha kino kino ki kam jong ka sorkar bad katei ka rai jong ki Rangbah Shnong, ka dei halor kine ki jing ia tyngkhuh kiba jia ha kine ki sngi, hapdeng ki Rangbah Shnong bad ka Kashari bad kumjuh bad kane ka sorkar Congress. Ha katei ka jingialang, la sngewthuh ba kin lum ruh ia ki Sengbhalang, ba kin ia treilang bad ki Rangbah Shnong, ba ka jingialeh kaba ki Rangbah Shnong, ki shim, ba ka long ka jing ia khih kaba tyngeh shisha, ba kan long kaba jop.