Ka polisi Thungkam ka la rim, ong ka KHNAM

Shillong 23, K’lyngkot:
Ka Khun Hynniew trep National Awakening Movement (KHNAM) ha kane ka sngi Thohdieng ka la ong ba ka polisi Bhah Thungkam ne ka Reservation Policy kam iaid kam shuh ka la rim namar ba la pyntreikam shwa ban ioh ia ka jylla Meghalaya.
U General Secretary ka KHNAM u Bah Batkupar Wahlang u la ong ba ka la dei ka por ban bishar biang ia kane ka Bhah Thungkam bad dei ban sangeh shwa ia ka jingpyntreikam ia kane ka polisi ia mynta.
“Ngin sa wad jingtip la ka sorkar ha ki snem ba la dep ka la pynmih ne em ia ka hukum ban pyntreikam ia kane ka polisi”, la ong u Bah Wahlang.
Ka KHNAM ka la wohnia ruh ia ka jingpyntreikam ia ka bhah pule watla kane ka polisi ka dei beit tang ia ka bhah thungkam jong ki trai jaka ka jylla. U Bah Wahlang u la ong ba ka KHNAM ka la pynlong ia ka jingiakren halor ka polisi Bhah Thungkam bad ki riew shemphang kiba sngew khia halor kane ka bynta. “Ka jinglong jong kane ka bhah thungkam ka long kaba bym skhem bad ka don ka jingkylli kaba jur halor kane namar ba la pdiang ia shwa ban ioh ia ka jylla Meghalaya ha ka 12 tarik Kyllalyngkot, 1972,” la ong u general secretary ka KHNAM.
“Lada dei ban wanrah da ka Ordinance, dei ban thaw ain da ka iing dorbar hynrei kam pat don satia ha katei ka por. Shwa ban ioh ia ka jylla, kam pat don ka kynhun myntri ne ka iing dorbar kaba pura”, u la ong.“Ka polisi Bhah Thungkam ha kane ka por, kam lah ban treikam namar ba la pdiang shwa ban ioh ia ka jylla”, u la bynrap biang bad bynrap, ba ka seng kan sa wad jingtip halor kane ka bynta.
U Bah Wahlang u la ong ba ka KHNAM ka dawa ba ia ka bhah pule dei ban shim katkum ka jingtbit jong ki khynnah pule ym da kaba pyntreikam da ka Bhah Thungkam bad u Garo kaba mar 40 percent.
Katba u working president ka KHNAM u Bah Adelbert Nongrum u la ong ba ha kano ka dur kata ka Bhah Thungkam ka treikam ha ka bhah pule.
U la ong ba ka KHNAM kan sa khot ia ka jingialang ha u bnai Lber ban iakren ia kane ka kam kham bha shwa ba kan iaid shakhmat.