Khot ia ki nongshna phlim na jylla sha Itanagar    

Shillong, 22 K’lyngkot:
Ki nongshna phlim na jylla Arunachal Pradesh ki la iawer lem ia ki nongshna phlim na kane ka jylla ban leit iashim bynta ha ka Film North East 2016 ka ban long ha Itanagar ha Arunachal Pradesh naduh ka 17 tarik haduh 20 tarik Rymphang 2016 ha Annexxe Lawns, Indira Gandhi Park, Itanagar.
Ki nongshna phlim na Meghalaya ki lah ban phah ia ki phlim jongki kiba lyngkot ruh bad ki documentary film ban pyni ha katei ka tamasa shi bynta ban kyntiew ia kane ka sap jong ki briew ba don ha ka’, la ong u Moji Riba u Director ka Film North East 2016  haba kren mynta ka sngi sha ki lad pathai khubor.
U la ong ba ki nongshna phlim ha kane ka thain ki la iakynduh jingeh ban ioh pisa namar ba kim tip lad ban ioh pisa naei.
“Ha kane ka tamasa phlim ngin don ka jingiathir ha kano ka rukom ban pynioh pisa ban kyrshan ha ka jingshna phlim” u la ong bad bynrap ba ka tamasa ka long ban kyntiew ia ka kam shna phlim ha kane ka thain.
Katba u Sonam Chombay u Secretary ka Information and Public Relations (IPR) ka Arunachal Pradesh u la ong ba ka sorkar Arunachal ka la pyniasoh bad ka Arunachal Film Festival ha kine ki lai snem ba la dep bad naduh kane ka por, kam shym la don ka tamasa ha kane ka thain kaba kynthup phra tylli ki jylla.