Na U Mukul, dawa ka UDP ban pynhap shuki ia ka kong Ampareen

Shillong, 21’lyngkot:
Ka UDP ka la thoh sha u myntri rangbah ka jylla u Dr.Mukul Sangma ba u dei ban pynhap noh na ka shuki myntri ia ka kong Ampareen Lyngdoh, myntri ka tnad pynroi sor. Katkum ka jingthoh kaba la soi da u General Secretary ka UDP u bah Allan F Dkhar u la ong ba dang shen ha ka 7 tarik u Kyllalyngkot ka High Court ka la pynmih ia ka hukum, kata ban shah ia ka Central Bureau of Investigation ban ujor sha Delhi pyrshah ia ka kong Ampareen bad 21 ngut kiwei pat halor ka kam kaba ia dei bad ka jingieng palat pud ki ing paki dulan ha kane ka jylla, “Ngi sngew ba khnang ba ka jingtohkit kan long kaba iaid beit iaid ryntih bad kan long kaba khuid ka dei hok ia ka briew kaba bat ia ka kam kaba heh ha ka jingshakri paidbah ba ka dei ban hiar shuki noh ban ailad ba ka aiñ kan leh ia kaba donkam khlem kano kano ka jingshah pyntieng lane khlem kano kano ka jingshah liang lada kan ym don shuh ha ka shuki” ong ka jingthoh na ka UDP.
Katei ka jingthoh kaba la pyllait paidbah sha kilad khubor ka la ong ruh ba ka bamsap ha ka tnad puleputhi ruh ym lah ban leh eiei namarba katei ka juh ka myntri kam shym la hiar shuki, “Halor kane ka dei ka kamram jong phi ban pynhap noh ia ka na ka kynhun myntri” ong biang ka jingthoh.
Kawei pat ka mat kaba ka UDP ka la thoh sha u MR ka dei halor ka jingpynkylla ka sorkar ia ka   Meghalaya Service and Conduct rules, kaba la khang ia kinongtrei sorkar ban bat kam shnong lane ha kino kino ki kynhun ne seng kiba trei paidbah, ka la ong ba kane ka dei ka jingpyniap noh ia ka mynsiem jong ka synshar paidbah naba ka thong ba ki trei ruh ka dei ban shakri ia u paidbah. Ka UDP ka la thoh ruh halor ka kam MDC shu sieh kaba ka KHADC ka la mynjur ia u bah J.Reenborn katba ka GHADC pat ia u Conrad Sangma bad ka la ong ba ka sorkar ka dei ban pdiang ia ka kyrteng jong ki naba laleh katkumki kyndon jong ka AD Rules kaba la mynjur da ka ing dorbar. Ka la ong ba katei ka jingpyni bor ka sorkar ka pyni ba kan don pynban ka jingma kaba lah ban mih ka jingiapyni bor markylliang ha ki por ki ban wan.