Rakhe pynneh mariang ha Nongstoin, Nongkrem

Shillong, 9 Jylliew:
Kum shi bynta jong ka jingrakhe ïa ka sngi pynneh mariang, ha ka 5 tarik mynta u bnai ha KHADC Nongstoiñ, ka Anderson Secondary School, New Nongstoiñ, ka la rah ïa ka nam lahduh da kaba 136 point na ka 150, ryngkat bad buskit peisa kum ka jingpynshlur ïa ki khynnah skul ban ieid bad sumar bha ïa ka Mei Mariang.
Ka St. Xavier Secondary School( Day Section), New Nongstoiñ ka la wan ba-ar da kaba kamai 110 point ryngkat ka peisa buskit, kajuh ka skul tangba ka Morning Section ka la ba-lai da kaba kamai tang 99 point ryngkat ka buskit peisa katba ka Ri Lyngngam Secondary School na sor Nongstoiñ hi, ka la wan basaw da kaba kamai 85 point bad ka peisa buskit.
Ka jingrakhe ïa kane ka sngi khraw da ka nguh ka dem ïa u Trai Nongthaw bad ban burom bad ñiewkor ïa ka Mei-ramew- Mei Mariang kiba kdup ïa u khun bynriew, ka la long kaba pynkmen bad shongkun bha. Ka jingsnoh kti lang jong u Bah Loveming Wanniang, Ranger, u Bah Genes Thongni, DM, baroh ar na ka Soil bad Water Conservation Nongstoiñ, ryngkat ka jingdon lang jong u ADO ka Horticulture Nongstoiñ, u Bah Joseph Mukhim, kiba la ai jingmut bad kyntu ban sumar sukher bad pynneh pynsah ïa ka jinglong ryntih jong ka Mei Mariang ban dup manbha u khun bynriew, ka la nang pynkhraw shuh shuh ïa ka jingrakhe.
Ha kane ka jingrakhe ba la pynlong ha Conference Room jong ka KHADC Nongstoiñ Branch da ka Meghalaya Environment Front (MEPF), la pynlong ruh ka jingïatai nia halor ka phang “Ki jingkyrkhu bad ki jingtim ba mih na ki Projek pynmih ding Ilektrik ha ka jylla”, ha kaba kiba kyrshan ïa ka Ilektrik Projek ki la kamai 26 point katba kiba pyrshah 21 point.
Kawei pat ka khubor, ka iathuh ba ka Khasi student’s union, Nongkrem unit ka la ioh pynlong da ka jingsam ia ki symbai dieng ha ryngkat ka jingiathung lang ia ki symbai dieng hapdeng ki dkhot jong ka seng bad ki khynnah skul, la ioh ban sam ia ki san tylli ki skul kiba don ha ki thain Nongkrem, kata ha ka Salem Secondary School, Pahsyntiew Memorial Secondary School, Nongkrem Government Upper Primary School, Nongkrem Higher Secondary School Bad Ka Nongkrem Presbyterian Secondary School ha ka 6tarik jylliew 2013. Ha katei ka sngi La ioh ruh ia ki jingkren kyntu kynpham na u General Secretary Iaishah Warkhyllew, na u Education Secretary Wanshan Kharmudai uba la kren shaphang ka ka theme “Think, Eat , Save” jong katei ka sngi bad na ki principal and Headmaster jong kitei ki skul kiba la iashimbynta shitrhem ha katei ka sngi. Kyntang iawai Ka seng ka ai khublei ruh ia baroh ki dkhot bad ia ki nongiarap/nongkyrshan jong ka seng kiba la ialeh shitom ban pynlong ia katei ka sngi kaba jop.