‘Kane ka dei ka Ing mane ki Ksuid’ tah ha dur mot Jisu ha Nongmensong

Shillong, 19’lyngkot:
‘Kane ka dei ka ïing mane ki ksuid’ ka dei ka jingthoh kaba la thoh ha ka ktien phareng bad ia katei ka jingthoh la tah ha ka dur mot u Jisu kaba don ha khmat ka skul St Jerome jong ka Sacred Heart Parish Nongmensong. Ki nongshong shnong katei ka shnong ki la lap ia katei ka jingthoh mynta ka step jong ka sngi hat majai kata hapdeng ka por 9 haduh 10 baje mynstep ha ka por ba ki briew ki dang khreh ban leit sha ki jaka trei jong ki. Ki pulit ki ioh kem ia u briew uba la tah ia katei ka jingthoh, bad utei uba la tah ia ka jingthoh u dei u ba la tip kyrteng kum u Wanphrangsngi Majaw uba shong basah ha Lyngkyrding Lumshyiap. Utei u samla u la thoh ruh ia la ka jong ka kyrteng ha ka kot sada kaba u thoh ia katei ka jingthoh.
Hynrei u Rupang u la ioh jingtip ba utei u samla uba la tah ia katei ka jingthoh u dei uba don jingduna ha ka bor pyrkhat bad u dei ruh u samla uba la ju jah napoh shnong bad ba kiba haing hasem jong u ki ju wad ia u hynrei mynta ka sngi ki la ioh jingtip ba u la leit tah pynban ia katei ka jingthoh ha Nongmensong bad ba ki pulit ki la rah ia u.