Shillong, 18’lyngkot:
Ka tnad ba dei peit ia ka 108 Emergency Service Ambulance ka la kyntait ba don tang kawei ka kali 108 ha Tura, katei ka tnad ka la pynshai ba don ar tylli ki 108 kawei ka dei ban kit ban bah ia ki nongpang jong katei thaiñ bad kawei pat ka dei ka Inter State Facility Transfer ( ISFC). Lah ban kdew ba khyndiat sngi mynshuwa ka myntri ka tnad Social Welfare ka Deborah Marak ka la ong ba ka la ioh jingtip ba don tang kawei ka kali kit nongpang ha sor Tura bad ka la kren sngewkhia bha ia kane khamtam namar ka jingjia bthei bom kaba la jia ha ka tarik mynta u bnai ha Williamnagar.
Ha kaba ia dei bad ki jingkynnoh kiba la mih hadien ka jingbthei bom ha Williamnagar katei ka tnad ka la ong ba ia u briew uba la mynsaw ha katei ka sngi la pynkit da ka kali 108 kaba na Williamnagar sha Tura bad hadien ba la sumar ia u ar sngi hangtei la pynkit noh na Tura sha NEIGRIHMS, Shillong. Ka la ong ba ha katei ka por la phah ar tylli ki 108 khnang ban ioh pynkit ia utei u briew na Tura sha NEIGRIHMS, Shillong khlem dab uh jingeh ia u. Kala ong ruh ba la phah kawei ka 108 ISFT ban pynkynriah ia utei uba mynsaw na Tura sha Byrnihat bad hadien kata la pynkynriah biang ia u na kawei ka 108 sha kawei pat khnang ba kata kawei pat ka 108 kan ioh leit phai Tura noh ban beh sa ia kiwei pat ki nongpang ha ki thaiñ jong ka sor Tura.
Ha katei ka por katei ka tnad ka la pynshai ba la leh lut ia baroh ki jingdonkam ban peit ba kan ym ktah ia u nongpang bad ia kane ka kam ruh la leh ha ryngkat ka jingbthah ki doktor bad kaba la ioh jingmynjur ba ki bor bahalor. Hynrei ha kaba ia dei pat bad ka jingkynnoh ba u nongniah u la niah tohmet ia ka kali kaba kit ia u nongpang katei ka tnad ka la ong ba ka jingtohkit ka GVK EMRI-Meghalaya ka dang iaid.
Katei ka tnad ka la ong ruh ba ha kiwei pat ki jylla jong ka ri India ka jingpynkynriah ia u nongpang la leh da ka 102 projek ka bym shym la don ha kane ka jylla, kumta kam don kata ka jingshakri ha kane ka jylla ban pynkit ia u nongpang na Tura sha NEIGRIHMS, Shillong. Ka la ong ba ka 108 Emergency Service kaba la treikam la 6 snem ha kane ka jylla ka iarap ban pynkit ia u nongpang na ka jaka ba u don sha ki jaka sumar bad dei ha u nailar, 2012 ba la wanrah sa ar tylli ki kali Advance Life Saving sha katei ka tnad bad katei ka dei beit tang na bynta ka ISFT (Inter State Facility Transfer) kata ban pynkit na Shillong sha Guwahati bad Tura sha Guwahati.
Phi don ban ong eiei?