3sngi, sangeh trei ki nongtrei ka GHADC

Shillong, 18’lyngkot:
Ki nongtrei ka Garo Hills Autonomous District Council (GHADC) mynta ka sngi ki la shim ia ka rai ban sangeh treikam naduh ka sngi balang jong ka taiew bad kin bteng haduh lai sngi lynter, katei ka rai jong ki kala mih ha ka jingialang jong ki kaba la long mynta ka sngi kum ka dak ka jingpyrshah ia ka jingbym ioh tulop jong ki kaba la 6 bnai.
Lah ban kdew ba khyndiat bnai mynshuwa ka kynhun synrop ha GHADC kaba la ialam da ka seng NPP ka la leit ban ia kynduh ia ka sorkar ban ia kren halor ka jingkyrduh pisa ka District council ha kine ki sngi,hynrei ha katei ka jingiakren ka la lap pynban ba ka EC barim ha GHADC ka la shim pisa lypa na ka sorkar haduh T.16 klur tyngka bad ia katei ka pisa ruh la siew khyndiat bnai shuwa ban long ka elekshon MDc ha katei ka District Council.
Lah ruh ban kdew ba ka seng NPP ka la kynnoh ba ka daw ka jingsahteng ka tulop ki nongtrei jong ka kiba don kumba 1600 ngut eiei dei na katei ka daw bad ka la kren khia ruh ba katei ka jingsahram lypa ka sorkar ia ka District Council ka lah ban ktah ia ka tulop jong ki nongtrei bad mynta puk ki nongtrei katei ka Council ki la mih shakhmat ban pynlong ia ka jingiakhih bad ban dawa noh ia ka tulop jong ki kaba la kot mynta sha ka 6 bnai.