Hikai iada ban pynlait aksiden, ki pulit pyniaid kali

Shillong, 15 K’lyngkot:
Ki pulit pyniaid kali Shillong Traffic Police (STP) ki la kut ia ka prokram ban hikai bad ai jingshai ia ki paidbah bad ki nongniah kali ban lait na ka jingjia aksiden.
Kane ka taiew pynshai shaphang kumno ban pynlait ia ka jingjia aksien, la sdang naduh ka 10 tarik haduh 16 tarik Kyllalyngkot. Ha kane ka taiew, la pynlong ia ki prokram bapher bapher kiba iadei bad kumno ban iada bad husiar na ka jingjia aksiden.
La pynlong ruh ia ka rali da ka tnad Traffic  ha bynta bapher bapher ha ka nongbah kum shi bynta ban hikai ia ki briew bad ki nongniah kali. Ia kane ka rali la kaweh da u Bah H. Nongpluh, IG, Eastern Range na phyllaw ka State Central Library.
Haba kren sha ki nongthoh khubor, u Bah Nongpluh u la ong ba ka taiew iada ia ka jingjia aksiden la ju pynlong man u snem. “Da ka jingnang kiew ka jingjia aksiden ha Shillong, ka donkam ia ka jingpyniaid kaba kham biang ha ka nongbah Shillong”, u la ong.
U la ong ba ki ain pyniaid kali ki long kiba donkam palat namar ka jingbun ki kali  ha Shillong.  ”Ha ki sngi long skul, ka don ka jingpynbeit pyniaid kali kaba kham pher ban pynlait na ka jingsahkut kali”, la ong u Bah Nongpluh.
U Bah Nongpluh u la ong ba ha ka por long skul, ka jingdon jong ki skul ka la nangkiew ha ka nongbah.
La pynlong ia kane ka taiew ryngkat ka jingiatreilang ki nongniah kali kamai, kali shimet bad ka seng jong ki nongniah bike ha ka Shillong,
Ka jingiaid ka la sdang na State Central Library  sha Madanriting, Rynjah, Laitumkhrah, Dhanketi, Barik, Old Cherra, Garikhana, Mawlai petrol pump, Jaiaw, Mawkhar, bad Khyndailad  bad la pynkut ha Police Reserve ha Polo.
Shwa ia kane, u  Superintendent of Police (Traffic), u Sacheng Marak u la kyntu ia ki seng nongniah kali ban leit shah hikai ha ki thanat ia ki nongniah kali khnang ba kin sngewthuh ia ki rukom bad ki ain niah kali ban lait na ki jingjia aksiden.