Shillong, 15 K’lyngkot: Khadar ngut ki samla ka Dong Mihngi ki la iakynduh ia u myntri pla tyngka ka ri u Arun Jaitley ha nongbah New Delhi.
Kine ki 12 ngut ki samla ka Dong Mihngi hapoh ka lama ka Young Leaders Connect (YLC)) ki la iakynduh bad u Jaitley ha ka 14 tarik Kyllalyngkot.
Ia ka jingialang la pyniaid da u nongialehkai kynjatbol barim ka India u Bhaichung Bhutia (Indian Football Icon), ba kynthup ia u Kiren Rijiju (Minister of State, MHA), Sushmita Dev (MP), Gaurav Gogoi (MP) Karma Paljor (Business Editor, CNN-IBN), Conrad Sangma (myntri sorkar barim Meghalaya), Imo Singh (MLA, Manipur), G G Kamei (IRS), Hekani Jakhalu (Director, YouthNet), Tanushree Hazarika (Managing Director, Eclectic Group), Dr Lalrin Jahau (Surgeon, Mizoram) bad u Bjorn Deneise (GM, Mayfair Hotels).
Ha kane ka jingiakynduh, ka YLC ka la iathir bad u Jaitley halor kiba bun ki mat kiba iadei bad ka roi ka par jong ka Dong Mihngi.Ka YLC ka dei ka kynhun kaba thmu ban thaw ia ka rynsan ban iasam ia ki jingmut jingtip kiba lah ban ai jingmyntoi ia ki paidbah bad ka Dong Mihngi.
Da kane ka thong, ka YLC ka la aiti ruh ia ki jingai jingmut ha u myntri ka sorkar pdeng ban pyndonkam ia ki spah jong kane ka thain na ka bynta ka ioh ka kot. Ka YLC ka la ai jingmut ia u myntri pla tyngka ban thaw lad ban thaw kam thaw jam ia ki samla, ha ka pule puthi, bad kiwei kiwei ki lyngkha.
Ka Young Leaders Connect (YLC ) ka dei ka kynhun ba seng ha u snem 2011, da ki nongialam bad kiba jop ha ka jingtrei jingktah ban pynpaw ia ka thain.
Phi don ban ong eiei?