Tur ki nongshong iew sha JHADC ba pynkiew dor permit

Jowai, 14 K’ Lyngkot:
Da ki spah ngut ki paid nongshong iew ka Iawmusiang hapoh ka jingialam ka Jaintia Tribal Traders’ Association (JTTA) ki la leit tur mynta ka sngi sha ophis ka JHADC ban dawa na u Chief Executive Member, u ma Thombor Shiwat ban pynhiar dor ia ka dor jong ka permit ki nongshong iew kaba la pynkiew da 100 percent.
Shwa kane, ki paid nongshong iew hapoh ka lama jon ka JTTA, ki la pynlong ia ka jingialang ha Iaw-thymme ha kaba ki la rai ban leit tur sha ophis JHADC.
Ha ka jingiakynduh ki nongialam ka JTTA ia u CEM ka JHADC na ka liang u CEM u la ong ba hadien ba ka ophis jong u ka la ioh ia ka shithi na ka JTTA halor kane ha ki khyndiat bnai, u la rah ia ka ha ka Executive Committee ha kaba ka EC ka la rai ban pynneh ia ka dor kaba la dep rai.
Ka JHADC ka la pynkiew ia ka dor permit na ka T. 450 sha ka T.900 kaba kynthup ia ka bai stamp kaba 200 tyngka.
Ka JTTA bad ki nongshongiew ha ki open stall lane ki trep iew ki la pynpaw ia ka jingeh jong ki ban pdiang ia katei ka dor kaba la pynkiew arshah. Katba ia kito ki dukan dewbilat ba la shna bha (RCC Stall) pat khlem pynkiew haduh 100 percent.
U President ka JTTA, u Iatha Najiar u la ong ba ki nongshongiew ha ki trep iew ka JHADC ha Iawmusiang- Iawthymme ki ia kynduh ia ki jingeh khamtam ha ka jinglut jingsep. “Mynstep ki hap ban wankit ia ki jingsong bad mynmeit ban kit biang sha ki jaka buh da kaba ai bai nongkit kaba heh”, la ong u ma Najiar.
Utei u nongialam u la iathuh shuh shuh ba ka JHADC kam shym la pynbiang ia ki Godown  lane kudam ban buh ia ki mar jong ki. “Nalor ka bai nong kit ki nongkit nongbah, ki hap ban siew ruh ia ka dan kaba 10 tyngka man ka sngi, kane ka la ktah ia ka kamai kajih jong ki nongshong iew bad ngi la rai ban dawa na ka District Council
Hadien ba ki nongialam ka JTTA ki la iakren sani bha bad u CEM halor ka jingeh jong ki, na ka liang u CEM u la kyntu ia ki ba kin phah biang sa kawei pat ka jingthoh da kaba batai ruh ia ki jait jingeh kiba ki ia kynduh khnang ba un ioh rah biang ia ka sha ka EC.
Na ka liang ka JTTA ka la kyntu ia ki paid nongshong iew ba kin sangeh shwa ban siew ne pynthymmai ia ki permit jong ki tad haduh ban da ioh ia ka rai jong ka EC.