Bun eh ki nongthied masi na Laitlyngkot bad Mawngap

Shillong, 14’lyngkot:
Ki nongthied kiba bun eh na ka iew die masi kaba don ha Khanapara ki dei ki briew kiba na ka thaiñ Laitlyngkot bad Mawngap.
U nongthohkhubor mynta ka sngi u la ioh ban ia kren bad u nongshim wai ia ka iew die masi na ka hima Mylliem u bah Augustine Nongrum bad la kylli na u na kano ka thaiñ kiba bun eh ki nongthied masi thied masi na katei ka iew die Masi kaba hap hapoh ka jingpeit ka Hima Mylliem, u bah Nongrum u la ong ba ki briew ki ba wan thied masi ki wan na kylleng ka jaka kum na Nongstoiñ, Maw kyrwat, Shillong, Mawngap, Laitlyngkot, Pynursla bad kiwei pat ki jaka. Haba la kylli biang katkum ka jingkheiñ antad jong u na kano ka thaiñ kaba bam masi kham bun, u bah Nongrum u la ong ba kiba bun eh ki dei na Laitlyngkot bad na Mawngap.
La kylli ruh na u bah Nongrum kumba katno tylli ki masi ki poi ha ka shi taiew ha katei ka iew, u la iathuh ba ki masi ki poi kumba 1400 tylli eiei , la kylli biang ha kawei ka iew katno tylli ki masi ki iaid “Haba ki ia biang iew ki nongthied ki iaid kumba 1200 tylli eiei ha ka shi taiew” u la ong. U nongthoh khubor u la kylli biang hato kitei ki masi kiba poi sha Khanapara ki dei kiba naei , u la jubab ba baroh ki masi mynta ki poi tang napoh Assam kiba bun eh na Upper Assam. U la iathuh ba ki don ki mahajon na Assam kiba pynpoi masi sha Khanapara shuwa ban long iew, haba la kylli pat kino ki mahajon ba kham paw u la ong ba ki don lai ngut ki mahajon ba kham heh hynrei um tip kyrteng pat ia ki.
Une u nongthohkhubor u la kylli biang na u bah Augustine Nongrum katno kawei ka masi ka shong dor ha katei ka iew, u bah Nongrum u la ong ba ha katei ka iew ki ju die shi shi jur ki masi ym ju die tang uwei. U la ong ba ka dor jong ki shijur ki masi kaba rit eh ka sdang na ka T.40 hajar tyngka hynrei ka shong katkum ka jingheh jong ki bad kiba heh ki poi ruh sha ka T.90 hajar tyngka u la ong. Lah ban kdew ba kiba bun hi kimasi kiba don ha Khanapara ki dei ki masi ot doh hynrei don ruh katto katne tylli ki masi khun.
Utei u nongshim wai ia ka iew masi ha Khanapara u la iathuh ruh ba don ki por ba ki masi kim iaid iew bad ki trai masi (mahajon) ki set ia kitei ki masi ha katei ka iew bad ki buh ruh da ki nongap la jong ban peit bad ban bsa bam ia ki kaba la shna kyrpang ruh ka sem na ka bynta jong ki.