Hadien 15 tarik lah ban ia khih ka HANM namar ka Mookhep

Shillong, 13’lyngkot:
Ka HANM Jaintia Hills Unit ka la byrngem ban pynlong ia ka jingiakhih halor ka jingjia kaba ar ngut ki la shah siat iap ha ki pulit ha Mookhep. Haba ia kren bad u Rupang mynta ka sngi u President ka HANM Jaintia u Ma Shaniah Suchen u la ong ba kumba ka long mynta ki seng kiba ia don bynta ha katei ka jingiakhih kin dang hap ban shong jingialang ha kine ki sngi bad shen kin shim noh da ki rai ia khih namarba ka sorkar haduh mynta ruh kam patiaw eiei ia ka jingdawa jong ki, “Ngi lah ban shim ia ki rai ia khih hadien ka 15 tarik mynta u bnai” ong u Ma Shaniah Suchen haba ia kren mynta ka sngi bad u Rupang lyngba ka phone. U Ma Shaniah u la ong ba ki jingiakhih ba ki seng ia khih kin shim mynta ka kynti ka lah ban dei da ka proseshon paidbah lane ka shong kyllaiñ mongor, “Ngim don lad da kiwei pat ki jingiakhih,phi la iohi hi ba ka iing bishar kam shah shuh ban khot pakhang shnong ruh” u la ong biang.
Utei u nongialam ka HANM na Jaintia Hills u la ong ruh ba katei ka seng ka shim ruh ia ki ishu kaba ia dei bad ka jingeh ki samla wadkam kaba ia dei bad ka jingkhot pynlong eksamin da ka tnad DSC na bynta ka kam LDA ha East Jaintia Hills, “Mynta ngi dang phah mynhynin ka sngi i aka RTI sha u Deputy Commissioner, East Jaintia Hills bad mynta ngi dang ap jubab, ngin sa ia peit hadien ba la ioh jubab lada ym hun ngin ia khih” byrngem utei u nongialam ka HANM.
U ma Shaniah u la iathuh ba dang shen ka la don ka eksamin ia leh kam ha DSC halor ka kam LDA ha kaba 50 ki nong aplai ki don katba na kitei ka la don tang kawei ka kandidet kaba la pass,”Ka la tbit bha katei ka samla ruh, ki jingkylli te ki la dei shisha kiba eh” u la ong. U la iathuh ruh ba ha shuwa ia kane ka la don ka eksamin ia lehkam DSC ha kaba ki don 80 ngut ki nongiakhun hynrei kiba la poi sha ka eksamin ki don 79 ngut, “Halor katei ngim ioh jingtip bha ngi shu iohsngew ba kiba la pass ki ioh ia ka mark kaba 15, 18 haduh 20 mark,na kata ka daw ngi pan jingshai na ka ophis u DC halor katei ka kam” pynkut u Ma Shaniah President ka HANM.