Leit tynrah ka Van, na tdong ka trok iap uwei

Shillong, 12 ‘lyngkot:
Uwei na ki nong shong ha ka kali Maruti Van (AS11H – 2405), uba shong ha ka jaka shong kaba ha khmat, ula iap hajuh bad sa ar ngut kiwei pat ki mynsaw, haba katei ka kali, ka ia tyngkhuh bad ka trok, kaba don ia u number AS01DC – 1695, da kaba ka leit tyngkhuh na shadien. Katei ka kali Maruti Car, ka dei kaba leit sha Guwahati bad kaba wan na Silchar bad ka trok ruh, ka dei hi kaba leit sha Guwahati, hynrei katei ka jingjia, ka la jia noh ha Shillong bypass ha Madan Umroi, ha kaba ka jingjia, ka dei mynta ka sngi ha ka por 5.56baje mynstep. La kit mar mar, ia kiba mynsaw da ka 108 ha Bhoirymbong, ha kaba la pynkit ia arngut kiba mynsaw, U Amir Udin Laskal (24) bad U Iqbal Hussain (29) ha kaba la pynkit mar mar sha Bhoirymbong CHC bad hadien kata sha Shillong Civil Hospital. Ha kawei pat ka jingjia, uwei na ki nongshong ha ka kali Maruti Car, ML04B – 5921, uba shong ha khmat jong katei ka kali, ula mynsaw, haba la tynrah da ka trok, kaba wan na shadien, ka ML04C – 1189. Ka jingjia ka leit jia ha Wapung, kaba hap ha Khliehriat Block, East Jaintia Hills, ha kaba ka la jia hynnin ka sngi, ha ka por 10.43baje mynniet. La kit ia uba mynsaw, U Kynthem Phawa (17) sha Jowai Civil Hospital. Katei ka kali Maruti, ka dei kaba leit sha Iongkaluh na Jowai, haba ka ia tyngkhuh bad katei ka trok.