Ngi kwah ba u CEM un leh kham kloi, ong u bah Teiñ halor ka bhah EM

Shillong, 12’lyngkot:
Ka jingleit kyr shan ka UDP ia ka PDF ha KHADC kam shym la dei ba ka leit ban kyrshan dalade hi hynrei ka la don ka jingkyrpad na u CEM ka KHADC bah Pyn shngaiñ N Syiem ia katei ka seng ba kan ai lang ka jingkyrshan ia u, “Haba ngi iohi ia ki mat ba u CEM u la shim, ngi ruh ngi ai ka jingkyrshan kumba u la kyrpad ia ngi na ka por sha ka por, hynrei ngi da don ruh ka jingiakren ha kaba ia dei bad ki jingbate kam,um ban shu leit kumto khlem ka jing iakren bad khlem ka jingkyrpad na u CEM” ong u bah Teiñwell Dkhar,u nongialam ka UDP ha KHADC haba kren sha ki nongthohkhubor mynta ka sngi .
Utei u MDC ka Shella konstitwensi u la ong ba ha katei ka por ka dei ruh ka por kaba i kumba ka shuki u bah Pynshngaiñ kan hap noh pynban , kumta ka UDP haba ka iohi ia katei ka jingsynjor ka shuki u bah Pynshngaiñ, ka la leit ban ai jingkyrshan ia u lyngba ki kam kiba u la pyni- kata ki ishu ba u shim. “Ha ka por ba ngi leit ia kren -shuwa ban pyniasoh, ngi la ong ia u CEM ba u dei ban pyrkhat lang ia ngi ruh lada dang don ka lad ban ia sngewtynnad haba ia ai jingkyrshan, u ruh u la kular ba tang mar ia dep ka dorbar kyrpang (dorbar jied MDC shu sieh) yn bate kam thymmai noh hynrei hadien ba um shym la leh wat hadien ba la kut ka dorbar kyrpang, ngi la ia kren biang bad u ong ban leh noh ha u snem thymmai, ngi kwah ba u CEM u kham lehnoh kloi noh ia katei ka kam khamtam mynta lei lei dang shu sdang snem” ong biang u bah Teinwell Dkhar MDC ka UDP na Shella konstitwensi.
Katkum ka jingiakren bad utei u nongialam ka UDP ha KHADC la sngewthuh ba katei ka seng ka dang ap lano u CEM un ai noh ia ka bhah EM sha ka UDP kaba don mynta 3 ngut ki MDC. U bah Teiñ u la ong ruh ba mynta un ym shimti satia ia ka kam EM hynrei un ailad ha kiwei pat ki MDC na katei ka seng, kaba kin hap ban ia pynbeit. “Ka Central Body ruh ka la ailad ha ngi ki MDC ba ngin pynbeit katba ngi ia sngewbit ma ngi hi, hynrei nga te ialade nga la biang tang kane ka kam Chairman ruh, ngan aiti EM noh ha kiwei pat ha kane ka kynti mynta” bynrap biang u bah Teiñ.