U bah Pynshngaiñ u dei ban sngewnguh, ba nga la ai shuki CEM: Process

Shillong, 11’lyngkot:
“Naduh mynta ka sngi nga la long u dkhot ba pura ka seng Congress, nga la tyrwa ban rung sha katei ka seng lyngba u President ka Shillong City u bah Charles Pyngrope, ma u –u la phah sha ka MPCC bad ha ka sngi saitjaiñ nga la ioh ia ka shithi ba la pdiang ia nga” ong u bah Process T Sawkmie haba ia kren bad ki nongthoh khubor mynta ka sngi ha kamra treikam jong u.
La mih ki jing kynnoh ha kine ki sngi ba ka jingleit rung Congress u bah Process ka dei ka jingiasuhbuit ban pyn khyllem shuki CEM ia u bah Pynshngaiñ N Syiem, haba kren halor kane u bah Process u la ong “Nga dei tang u dkhot ba thymmai, kaba donkam ia mynta ka dei tang ka jingtrei shitom ban wanrah jingjop biang ia ka seng Congress ha ki elekshon ban wan”.
Ha kaba ia dei bad ki hamsaia kiba la saphriang ha kine ki sngi ba u bah Pynshngaiñ N Syiem u don ka jingthmu ban pynhap shuki ia u bad ki ar ngut ki EM u bah James Sylliang bad ka kong Grace Mary Kharpuri u bah Process u la ong “U bah Pynshngaiñ u dei ban sngewnguh ia ngi 3 ngut kiba la mih na ka ARPA ban leit thaw ia ka PDF bad lada khlem kine 3 ngut un ym ioh ioh long CEM tharai haduh mynta”.
Ha ka saiñpyrthei dei ban don ka jingsngewnguh markylliang, nga sngewnguh ia u bah Pynshngaiñ ba u la ai ia nga ia ka kam Dy.CEM, u bah Pynshngaiñ ruh u dei ban sngewnguh ia nga ba nga la aiti ha u ia ka shuki CEM, ha ka por ba la thaw ia ka PDF la aiti ha nga ia ka shuki CEM hynrei ngam sngew iahap kumta nga aiti noh ha u bah Pynshngaiñ uba dei u nongialam ka Congress ha KHADC” ong u bah P.T Sawkmie haba ia kren bad ki nongthohkhubor mynta ka sngi.
Ha kaba iadei bad ka jingleit rung Congress jong u , utei u MDC ka Mawlai Konstitwensi u la kob ba da ka jingleit rung jong u sa shisien biang ka seng Congress kan ioh ban synshar ha kane ka jylla ha u 2018. U la ong ba ka jingleit rung jong u sha ka seng Congress ka dei namarba u la iohi ba katei ka seng ka dei kaba heh bad kaba khlaiñ ha kane ka jylla bad ha ka ri India. U bah P.T u la ong ruh ba ka jingleit rung Congress jong u ka dei lyngba ka jingpynshlur ki nongkyrshan jong u na Mawlai konstitwensi na ka bynta ban wanrah shibun ki kam pynroi hapoh katei ka konstitwensi.