Halor ka Umsning Bye-Pass, kynduh DC ki nongialam RBPM

Nongpoh, 11 Kyllalyngkot:
Da ka jingsngew khia halor ka jingpynslem da ki bor ba deipeit jong ka NHAI, halor ka jing pyntrei ia u surok jong ka Umsning Bye-Pass, mynta ka sngi ki nong ialam jong ka Ri Bhoi People Movement (RBPM) ki la ia kynduh markhmat ia ka DC Ri Bhoi District ka Dr Pooja Pandey ha kamra treikam jong ka ha Nongpoh.
Ha kane ka jing iakynduh jong ki nong ialam ka RBPM ia ka DC,  ki la ia tai halor ka jingeh jong ki paidbah ha kaba iadei bad ka jingsniew bad khapngiah jong u surok ha Umsning tang na ka jingpynslem jong ka NHAI, ban trei ia ka Umsning Bye-Pass.
Ia kane ka jingleit ia kynduh ia ka DC, na ka liang ka RBPM la lamkhmat da u president Bah E.K Kharnaior bad secretary Bah John M.Mawphniang, ha kaba kum ki nongialam ki la leit ban ia kynduh ia ka DC dei hadien ba ki la ioh ia ka jingud na ki paidbah halor ka jingsniew jong surok ba 5 KM ha Umsning, kata na Nongthymai sha Umtrew kaba la wanrah shibun ka jingeh ia ki paidbah kiba iaid ba ieng ha une u surok u ba la dap tang da ki thliew ki syar suda, kaba lah ruh ban wanrah ia ka jingdheng kali ha ki thain Umsning, namar ka jingbun jong ki kali katba nangmih ki sngi.
Haba jubab halor kane, ka Dr Pooja Pandey, ka la ong ba na ka liang jong ki bor distrik, ki la dep lut ban phah ia ki kot ki sla sha ki nongpyniaid ka NHAI, kum ka jing ai bor ban sdang noh ia kane ka jingtrei, hynrei kim lah ban tip ia ka daw halor ka jngpynslem jong ka NHAI ban sdang trei ia katei ka Umsning Bye-Pass.
Ha kaba iadei bad kane, ki nongialam jong ka RBPM ki la rai ba kin leit ban iakynduh ia u Project Manager jong ka NHAI, khnang ban tip bad shai paidbah ia ka daw halor jong ka jingpynslem ban trei ia kane ka surok ha Umsning, namar kumba ka long mynta ka jingpynslem ban trei ia ka Umsning Bye-Pass, ka wanrah ia ki paidbah ba kin sah ha ka umdum.