Ia kynduh ka CCIB ia u CEM ka JHADC

Jowai, 11 K’ Lyngkot:
Ka Coordination Committee on International Border (CCIB) kaba kynthup ia ka FKJGP, KSU bad ka HNYF, mynta ka sngi ka la leit ia kynduh ia u Chief Executive Member ka JHADC halor ka jingiadei bad u pud u sam India bad Bangladesh.
Ha katei ka jing iakynduh ki nongialam ka CCIB ki la pynpaw ha khmat u CEM ka JHADC u ma Thombor Shiwat ba ka CCIB kam shym la pyrshah ia ka jingker sainar shiah ha International Border India bad Bangladesh, hynrei kaei kaba ki pyrshah ka long ia ka jingker kaba 150 yards shapoh u pud u sam ka India ha kaba bun ki bri ki lyngkha jong ki paidbah ki la hap sha Bangladesh. Ka CCIB ka la pynpaw ba ka ieng skhem ha ka jingdawa ban ker sainar shiah naduh na Zero point khang ba ki jaka puta jong ki paidbah kim nym leit satia sha Bangladesh. Ka CCIB ruh ka la pynpaw ia ka jingsngewkhia ia ka jingshah ktah ki paidbah bad halor kane ka nongrim ka CCIB ka la kyrpad ia u CEM ka JHADC ban wad ia ki lad ki lynti ban khanglad ia ka jingduh ki jaka ki puta da kaba khanglad ruh ia ka jingker sainar shisha kaba haduh 150 yards shapoh u pud ka India. U bah Joe Marwein President FKJGP, ula ong, ka jingieng pyrshah ka long ba kan ym don ka jingduhnoh ia ki jaka rep jong kito kiba shong ha ki khappud bad ka Bangladesh kiba ju bsa bad pynbit pynbiang ia la ka iing ka sem. Ki nongialam ka CCIB kiba donlang ha katei ka jingiakynduh ia u CEM ka JHADC ki kynthup ia u Chairman ka CCIB, u bah Kmen Myrshiang, u bah Joe Marwein nalor kiwei kiwei.