Pan jingshai na U DSP, halor ka tohkit bamsap

Jowai, 11 K’ Lyngkot:
Ka Jaintia Youth Federation (JYF) bad ka Jaintia Student Union (JSU) ha ka jingleit ia kynduh jong ki bad u Deputy Superintendent of Police (DSP), ki la pan ka jingpynshai na u ba balei ki pynslem ban pyndep kloi ia ka jingtohkit halor ka jingpyndonkam bakla iaka pisa paitbah, da u Ex CEM barim ka JHADC u ma Madonbai Rymbai, kaba la paw pyrthei ha u snem 2014 lyngba ka RTI report, kaba la ioh pdiang da ka kong Arlin Dkhar nongshong shnong ka Moo pyllaitsyiar, Khliehtyrshi.Na ka liang jong u DSP ka west jaintia Hills District, uba dei u nongtohkit ia ka jingbamsap kaba la kot haduh T. 1,18,50,000/- kaba kynthup ia ka Discretionary Grant (DG) kaba la kot haduh T. 66 Lakh bad ka Gratuity Relief kaba la kot haduh T. 52,50,000/-, da u Ex CEM u Ma Madonbai Rymbai u ba dei ruh u MDC ka thain Khliehtyrshi-Sohmynting. U la ong ba ka jingtohkit ka la dep ia baroh kiba shah kynnoh donkti ban pynjah klep ia ka pisa paitbah, hynrei kaba sah mynta ka long sa tang ban ioh ia ka prosecution sanction na ka sorkar ba kin ioh phah noh sha ka ing bishar ban pyndep ia ka kam kaba dangsah. Kaba pynlyngngoh eh ia ngi kum ki sengbhalang bad ia ki paitbah jong ka Rilum Jaintia kiba don ka hok ban tip bad iohi iaka jingtohkit kaba khuid bad ba shai kdar, balei ka tnad pulit haduh mynta ba la dap ar snem pura ka jingtohkit kim pat lah ban pyndep lane ioh ia ka prosecution Sanction na ka sorkar jylla? Kaei ka daw? Hato ka ain ka iapher ne em ia u barit bad ia ki ba long heh long hain ba ki nongbamsap kiba la paw kyrteng ym lah ban pynngat kyndon ain bam sap ia ki lane pynshitom ia kynthoh ki ar seng. Ki ar seng kin ym shong kli kti bad kin dang iai bteng ban bud dien ia ka ne ka kam bamsap jong u Ex CEM MB Rymbai, tad haduh ba ki paitbah jong ka Rilum Jaintia kin ioh biang ia la ka hok kaba ki la duh noh na ka jingshah pyndonkam bakla ia ka kyrteng jong ki da utei u Ex Cem, khnang ba kan ym jia shuh nangne shakhmat, ngin ieng skhem beit ban dawa na ka sorkar ba dei ban pynshitom mardor ia kum kine ki riew shim kabu ia bor ba la pynkup ha ki kum ki nongmihkhmat.