Thmu shim jaka ki shipai ha Rangmen

Nongpoh, 10 ‘lyngkot:
Da ka jingsngew khia kaba jur halor ka jingthmu shimti ia ka jaka kaba don ha Nongsder, Ri Bhoi District da ka Rangmen Cantonment Army, ha ka sngi Saitjain, ki dorbar shnong jong ki lai tylli ki shnong kiba kynthup ia ka Mawpun, Pyllun, Nongsder bad Dam ki la pynpaw ia ka jingpyrshah kaba jur halor kane ka jingthmu jong ka sorkar jylla.
Lah ban kdew, ba ka tnat shipai jong ka Rangmen Cantonment Army ka la hap ban ai ia ka jaka jong ka kaba don ha ki thain Umroi na ka bynta ka jingpynheh ia ka Umroi Aiport, hynrei kane ka jingaiti jong kane ka tnat shipai ia la ka jaka ka la long hapdeng ka jingiakut bad ka sorkar Meghalaya ba kan ai kylliang pat ia ka jaka sha kane ka tnat shipai.
Shi bynta ban pyrshah jur, halor kane ka jingthmu kaba long sopsop hapdeng ka sorkar jylla bad kane ka tnat shipai na ka liang ka joint action committee (JAC) ki la pynlong ia ka jingialang kaba kyrkieh ha ka sngi Saitjain ia kaba la wan ban ia shimbynta ruh da ki spah ngut ki paid nongshong shnong jong kitei ki shnong.
Da ka jingsngewkhia bad dukha ka mynsien ha kaba da ki spah ngut ki paidbah ki la wantuid sha kane ka jingialang ba la pynlong da ki nongialam jong ka JAC, ban pynpaw ia ka jingpyrshah kaba jur ia kine ki riew khwan myntoi shimet ki bym shem la don shuh ka jingpyrkhat ia ka shong suk shong sain bad ka lawei jong ki khun ki kti hadien habud, ban ai ka jingkyrshan kaba radbah ia ki nongialam ka JAC, kiba la pyrshah jur halor ka jingthmu ki jong ki riew shimet ban die duh ia ka jaka jong ki sha ki shipai.
Haba ia kren bad u Bah W. Shangpliang, president ka JAC, u la ong, ba ka dorbar shnong jong kine ki lai tylli ki shnong ki la shim ia ka rai kaba tyngeh ban pyrshah jur halor ka jingthmu jong ka sorkar jylla ban ai ia ka jaka kaba don ha Nongsder sha ka Rangmen Cantonment Army kaba la aiti ia la ka jaka sha ka jingpynheh ia ka Umroi Airport.
“Da lei lei ngim hun bad ngim suk ka mynsiem ia kane ka jingthmu jong kine ki Nongiada Ri (Rangmen) ba kin shimti ia ka jaka ha Nongsder, wat ia kaba la don lypa ia ka jaka kaba heh hapoh Rangmen ruh kim lah ban pyndonkam, hynrei ki shu kwah rhah ia kaei kaei ka bym lah ban long”, pynpaw u Bah Shangpliang
Halor kane ka jingpyrshah jong ka JAC, ka Confederation of Ri Bhoi People (CoRP) lyngba u Working President Bah Bandari Ryntathiang ka la ai ia ka jingkyrshan kaba pura ia kane ka jingpyrshah jong ka JAC.