Sam sniang khun, ka BBC ha Nongstoin

Nongstoin, 10 K’Lyngkot:
Ka balang Believers Church Shillong Diocese, ka dei kawei na ki balang khristan kaba ju ai jingiarap sha ki briew bad ki long iing kiba duk ba suk bad kiba shem jynjar ha kiba bun ki liang, bad katei ka balang ka ju pynlong ruh ia ka prokram Community Development Project kaba dei ka prokram sam tiar sha ki briew ba duk.
Katei ka balang kala ioh ban pynlong ia katei ka juh ka prokram ha Nongstoin, na ka bynta ban sam tin bad sam sniang sha kiba duk bad la pynlong ia katei ka prokram mynha ka sngi saitjain jong ka taiew bala lah ha phyllaw jong ka Bridge of Hope Believers Church Mawiong Pyndengrei bad la pyniaid ia ka prokram da u Rev. KS. Mawlong ha ryngkat ka jing iadon lang u MDC ka Nongstoin bah LG Nongsiej kum u kongsan, u rangbah dong ka Mawiong Pyndengrei bah S. Marngar, bah Filling Lyngdoh, bah Didimus ki dkhot jong ka balang bad kiwei kiwei.
Ha shwa ban sam ia ki tin bad ia ki sniang sha kiba la shah jied la ioh shwa ia ka jingduwai bad la ioh ruh ban pule na ka ktien ka jong u Blei da u Rev. KS Mawlong bad la ioh ruh ia ka jingkren lyngkot na u wei na ki misionary u Abraham Debbarma ha kaba u la pynkynmaw ia ngi ba ha kane ka juk stad saian mynta bun na ngi ki briew, ngi ka klet noh ia shibun kiei kiei bad khamtam ia ka jingieid ka jong u Blei kaba lah ban ai ia ngi ia ka jingim bym ju kut.
Na ka liang jong u bah Nongsiej haba ai jingkren kum u kongsan ha katei ka sngi u la ai ka jingiaroh bad ai khublei kyrpang ia katei ka balang kaba la leh ia shibun ki kam isynei na ka bynta ki briew kiba duk, bad u la ong ruh ba kaba sngew tynnad ka long ba ka balang ym tang ba ka ai jingiarap na ka bynta ka jingdonkam jong ka doh hynrei wat ia ka jingdonkam kaba kynja mynsiem ruh.
Shuh shuh u la ong ruh ba ka jingleh jong katei ka balang ka long ym na ka bynta ka jingmyntoi ne ioh burom jong no re hynrei na ka bynta ban pyndon burom ia u Blei bad katei ka balang kala lah bha ia shibun ki briew bad u la pynkut ruh da kaba u ong ‘ to ngin nym klet ia kiba la leh bha ia ngi’.
Katei ka balang ha katei ka sngi kala ioh ban sam bad aiti ia ki tin sha ki 17 tylli ki longiing ba duk bad kiba donkam mar mar shi ban bad kumjuh ia ki sniang khun ban ri la ioh ban sam sha ki 9 tylli ki longiing ha kaba la sam da u kongsan sha kitei ki longiing.
Kiwei kiwei ki nongkren ha katei ka sngi ki kynthup ia u bah F. Lyngdoh, bah S. Marngar bah Didimus bad kiwei kiwei.