“Ka kam CEM dei jong ka Congress, ym jong ki MDC independent”

Shillong, 03 K’lyngkot:
U MDC ka Mawlai u Bah Process T Sawkmie u la kam ba kam ban jied iano ban long CEM ha KHADC ka dei ha ka party Congress kaba don bun paid bad u la ong ba kam dei ka kam jong ki MDC shi met ban tuklar iakane.
Kane ka jingpyn phai nia jong u Bah Process ka long hadien ba u Bah Adelbert Nongrum jong ka KHNAM u la kynnoh ba dei u Bah Process uba thmu ban pyn khyllem ia ka shuki CEM jong u Bah Pynshngain N Syiem da kaba iasuh buit bad u Myntri Rangbah Mukul Sangma.
Ha ka jingpynlait khubor ha kane ka sngi u Blei u Bah Process u la ong ba ka jingkynnoh jong u Bah Adelbert Nongrum ba u pynkhih ia ka shuki CEM, ka dei tang ka jingthmu ban wanrah ia ka jingiapher jingmut bad pynjngai ia ka jingiadei jong u bad u bah Pynshngain N Syiem khnang ba ki paidbah kin pyrshah ia u lada un ioh lad ban shimti ia ka kam CEM.
“Wat hapdeng ka jingpyrshang ban wanrah ia ka jingiapher jingmut ka jingiadei bad u bah Pynshngain N Syiem kan neh haduh kaba kut namar udei u paralok ba lah ban shaniah”, la ong u Bah Process.
U Bah Process u la ong ruh ba baroh la tip ba ka kam CEM ka dei ka kam ki MDC Congress namar ki don ka jingbun paid , ym jong ki MDC independent.
U MDC ka Mawlai u la ong ba ka jingkynnoh jong u Bah Adelbert ba ka KHNAM ka kyrshan ia ka PDF, ym ia u Bah Process, ka dei ka jingkren tang ban shu da rapjot namar kham mynshuwa lah bein lah khoh bad pynthoh bria ia ka PDF bad ia u. “Ai ba ki paidbah kin bishar ia kane”,la ong u Bah Process.