Leh politik jaboh ka Congress ia ka kam MDC shu sieh

Shillong, 03 K’lyngkot: Ka NPP ka la takrain ia ka Congress kaba shong ha liang synshar ha ka jylla ia ki kam leh politik jaboh halor ka kam thung MDC shu sieh ha Garo Hills Autonomous District Council (GHADC) kaba la pynsahteng ia ka kyrteng u Conrad K Sangma uba la phah da ka Executive Committee (EC) ka GHPA la ar bnai tam naduh u Naiwieng.
Ka NPP ka la ther ba kane ka dei ka kam buit poh jong ka Congress namar ba kaei ka jingeh ban shu pdiang ia ka kyrteng haba la dep phah haduh ar bnai, katba mynshwa ia ka kyrteng jong u MDC shu sieh ha
KHADC u Bah Gabriel wahlang tang shi miet la dep mynjur ia ka kyrteng
jongu.
Ka EC ka GHADC ka la dep phah ia ka kyrteng u Conrad naduh u Naiwieng sha ka tnad District Council Affairs. Nalor u Conrad ka EC ka la phah lang ruh ia ar ngut ki kyrteng MDC ban long EM hynrei haduh mynta ia kine ruh khlem pat mynjur satia.
Ka jingslem ban thung ia u MDC ka pyni ia ka kam barieh jong ka sorkar jylla. “Ka kot ka sla ka dang sahteng bad ka sorkar bad ngin buddien ia kane ka kam”, la ong u James K Sangma u nongai ktien ka
NPP.
Kawei ka jingleh kyllain ka sorkar ka dei namar ba ka Congress ka la tieng thot thot ban pynskhem ia ka kyrteng u Condrad namar ba u dei uwei na ki satar ban pynkhih bad pyntwa ia ka ktem ka Congress ha Garo Hills.
Namar ba lada mynjur ia ka kyrteng jong u Conrad, yn sa shimti artad ia ka kam kum u CEM ha jaka jong u Denang T Sangma.
Ka Garo Hills Progressive Alliance (GHPA) ka la pynskhem ia ka kyrteng jong u Conrad ha ka 16 tarik Risaw, 2015 ban long kum u Chief Executive Member (CEM) hynrei namar bym shah ka ain, la hap ban sieh MDC shwa bad la aiti shwa ha u MDC na Williamnagar u Denang Sangma ban shimti ia ka kam CEM ha ka 21 tarik Risaw, 2015.