Pynpaw pyrthei ia ki riti dustur ka Ri Bhoi

Nongpoh, 22 Nohprah:
Ka Ri-Bhoi Cultural Upliftment Committee ha ka jingiatreilang ryngkat bad ka Meghalaya Tourism Development Association ha ka sngi Nyngkong jong ka Taiew ka la pynlong ia ka tamasa lehkmen, kum shi bynta ban pynpaw pyrthei bad ban pynsngewthuh ia ki paidbah ka Ri Bhoi District, halor ki jingriew spah jong ka District kaba don ruh ia shibun ki riti ki dustur bad ki kolshor tynrai kiba dang im haduh kine ki sngi.
Ia kane ka tamasa lehkmen ba la tip kum ka “Ri-Bhoi Cultural Festival” la pynlong ha Orchid Lake, Umiam, ha kaba u Dr.DD Lapang uba dei ruh u MLA ka Nongpoh, u la wan ban shim bynta kum u kongsan ha kane ka tamasa lehkmen ha ryngkat ka jingiadonlang naduh ki Sirdar, ki Lyngdoh Raid lem bad ki riew rangbah jong ka thain, kaba la pynphuh pynphieng ha ki ba harukom namar kaba dei ruh ka jingdonkam ban pynneh pynsah iaki riti ki dustur.
Ki jingshad bad ki jingrwai tynrai kiba la pynkhih win ha kane ka sngi ki kynthup iaka jingshad, ‘ Shad Shoh Kba’ ba la wan shad da ka Raid Nongbri, ka jingrwai tynrai na ka Raid Bhoi Lasa, ka Shad Shut wait bad shad Rah Kynthei, na ka Raid Nonglyngdoh bad kynthup ka jingrwai tynrai u Bah Justine I. Sun kaba dei halor ka jinglong jingman jong ki briew ha Raid Nonglyndoh bad kawei na ka jingrwai kaba la paw bha ba la tip kum ka ‘Shi eh ka Khwai Dohkha”.
Haba kren ruh ha kane ka sngi kum u kongsan, u Dr. D.D Lapang u la ai ia ka jingiaroh ia kaba khraw ia ka Ri-Bhoi Cultural Upliftment Committee bad ka Meghalaya Tourism Development Association kiba la shim khia ban plie ia ka lad na ka bynta ki kynhun bapher bapher ka Ri-Bhoi ban pyni paidbah ha rynsan halor ka jingdon jongki ia la ka rwai bad ka shad tynrai, kaba long ruh kum ka jingkyrsiew thiah ia ki paidbah ka Ri-Bhoi ba kim dei ban klet ia la ka tynrai, namar ha kane ka rynsan la iohi ba ka Ri-Bhoi ka dang don shisha ia ka riti ka dustur tynrai ba dang don haduh kine ki sngi kumba la ialam da u mynbarim bajah.
U la ong ruh ngi dei ban long kiba sngewsarong halor ka riti ka dustur kaba dang neh dang sah haduh kine ki sngi, namar kano kano ka jaid bynriew ka bym don ia la ka tynrai ka dei ka jaid bynriew kaba iap.
Kumta lyngba jong kane ka tamasa, la khmih lynti ruh ba kum kine ki prokram kin dang bteng ha ki por ban sa wan, khnang ba kan long ka jingkyrsiew thiah ia ki paidbah hapoh jong ka Ri Bhoi District ne ha ka jylla hi baroh kawei.