Pyrshah ka FKJGP, ba shah ujor U Sirdar Mawlong

Shillong, 6 Jylliew:
Ka Federation of Khasi Jaintia and Garo People (FKJGP) hapoh ka jingialam u Samla Ksanboklang Kharshiing, General Secretary FKJGP Southern Riwar Zone, Bah Batyngshaiñ Ryngnga President FKJGP Southern Riwar Zone, Bah R.L. Nongrum President FKJGP Sohra Circle, Bah D. Phanbuh President FKJGP Laitryngew Circle bad Samla Damil M. Bynnud President Khasi Student Union (KSU) South Khasi Hills (Sohra) ki la ia kynduh kyrkieh ha ka 6tarik Jylliew 2013 ha Saitsohpen Hall Sohra ha kaba iadei bad ka jing ujor jong u Bah Stodar Dkhar pyrshah ia u Bah Khraw Iangrai Sirdar of Mawlong Sirdarship, kaba 24tarik Iaiong 2013.
Kitei ki nongialam Sengbhalang ki la pynrem jur ia u Bah Stodar Dkhar uba long ruh u President of Meghalaya Land Owners and cultivators Association (MLOCA) halor ka jingpyntieng kohtympan jong u, ia u Bah Khraw Iangrai, tang na ka daw ka jingkwah jong utei u Sirdar ka Hima Mawlong, ban bishar bniah ia ki kot ki sla jong ki bar jylla kiba shu wan tang ban bylla shipor hapoh ka Hima Mawlong ba kin rung ha ka thup pynrung kyrteng ban jied ia ki nongmihkhmat ha ka Election ba la dep (Electroral Roll).

Na ka liang jong kitei ki nongialam Sengbhalang ki la pynrem jur ia u Bah Stodar Dkhar u bym don ka jingkitkhlieh ei ei ia ka thaiñ bad ka jaidbynriew, ha ka jingshisha ula dei ban ai ka jingiaroh kum ia une u khlieh Nongsynshar uba pyrshang ban iada ia ka jaidbynriew barit paid jong ngi hynrei u theh umpjah pynban ia ka mynsiem ieit ri jong utei u Sirdar.

Shuh shuh kitei ki nongialam Sengbhalang kila pynrem jur ruh ia ka jingshah byrngem jong u Rangbah Shnong Shella ha ki bar jylla tang na ka daw ba u pyrshang ban khanglad ia ki bar jylla ba kin rung kyrteng ha ka Electroral Roll.

Kumta ki nongialam ka FKJGP bad KSU kiba don hapoh ka thaiñ Sohra bad Shella kin sa khot noh shen ia ka jingiakynduh lang jong baroh ki khlieh nongsynshar kiba don hapoh ka thaiñ Sohra bad Shella ban iatai sani halor kane ka phang bad lada i donkam, ban khot da ka jingialang paidbah ban iatai madan halor ka jingpyntieng kohtympan bad byrngem ia ki khlieh nongsynshar kiba don ka mynsiem ban iada ia ka jaidbynriew.