Lah ban kiew ASI kong Wansuk

Shillong, 6 Jylliew:
Ka Kong Wansuk Myrthong kaba la lah ban kiew ha kliar u lum Mt Everest ka lah ban shah pynkiew kyrdan Assistant Sub-Inspector (ASI) na ka kyrdan pulit langrut.
Ka sorkar ka lah ban pyrkhat kyrpang ia ka jingwanrah nam jongka ia ka jylla da kaba pynkup burom bad ban kyntiew kyrdan syndon kum ka ASI ha 1st MLP battalion.
Ia mynta ka Kong Wansuk, ka dei ka pulit langrut ha 1st MLP battalion hynrei naduh ba la jop ban kiew ia u lum Mount Everest, la don ka jingsngew hangne hangtai ha tnad pulit ba kan sa shah pynkiew kyrdan halor kane ka jingjop jongka.
U Myntri rangbah ka jylla u Mukul Sangma u la ong ba ka sorkar kan pynkup burom ia kane ka longkmie kaba la wanrah burom ia ka jylla. U la ong kane ka longkmie ka dei ruh ka dkhot jong ka North-East India Everest Expedition Team, kaba lah ban kiew ha kliar u lum Mt Everest.
U commandant ka 1st MLP Battalion u Bah AR Mawthoh u la ong ba u dang ap na ka sorkar ban ai ia ka jingmynjur ban kyntiew kyrdan ia ka Kong Wansuk sha ka kyrdan Assistant Sub-Inspector. U Bah Mawthoh u la pynlong ia ka jingkhwai bam hynne halor kane ka jingwanrah nam ka Kong Wansuk.
Ka Kong Wansuk ka la shah pynkup burom ha u Lat ka jylla Meghalaya u RS Mooshahary hynnin ka sngi bad u la burom ruh ia ka da kaba ai ba kan thung ia u dieng ‘Maidenhair’ ha phyllaw ka Raj Bhavan. Une u dieng katkum ka jingong ki stad saiantis u lah ban im haduh 3000 snem.
Ka Wansuk ka dei kaba ar na jylla Meghalaya ban kiew ha kliar u lum Mt Everest. Shwa ia kane, u Bah Gary Jarman Lamare u la pyndep ia ka jingkiew mynshem snem.