Sangeh iaid paidbah ki nonghikai SSA

Shillong, 20 Nohprah:
Ka All Meghalaya SSA School Teachers Association (AMSSASTA) seng kmie ka la shim ia ka rai ban pynsangeh noh shuwa ia ka jingiaid paidbah ba la thmu ban pynlong lashai ka sngi ka ka 21 tarik mynta u bnai, na ka daw ka jingkyrpad jong ki para nonghikai lem bad ki district Unit bapher bapher bad sa kawei ruh ba ka sorkar ka la pyllait biang sa ia ka tulop kaba ar bnai kata jong u bnai Nailur bad u Risaw nalor ka shi bnai kaba la pyllait kham mynshuwa kaba dei jong u bnai Nailar kaba sah mynta ka long sa ar bnai pura kata jong u bnai Naiwieng bad u Nohprah.
Katei ka kynhun ki nonghikai ka la ong ba kam kwah ban pynbunkam ia ki nonghikai ban wan sha ka jingialang paidbah khamtam eh ha kane ka por khim, ha kaba ki ki nonghikai ki bunkam ban pynkhreh ia ka kristmas bad snem thymmai. “Wat la ka sorkar kam lah ban pyllait lut ia ka tulop ba ka Association ka dawa hynrei ki nonghikai ki la kham sngew im mynsiem khyndiat bad ki don jingkyrmen ba kin ioh ban leh kmen kristmas kumba long lem kiwei pat ki para nonghikai ha ka jylla. Watla kane ka jingtip ka longkyrkieh eh hynrei ka Association ka kyrpad ia ki nonghikai SSA ba kin pdiang ia kane ka jingpyntip” ong ka kyrwoh khubor.
Ka AMSSASTA ka buh ia ka jingkyrpad ia ka sorkar ba ka dei ban shim khia ban pyllait lut noh ia ka tulop kaba dangsah khnnang ba kan nym ktah ia ki nonghikai skul SSA ha. Lada ka sorkar kam shim khia ka Association kan sa shong pyrkhat ia kane ryngkat bad ki district unit bapher bapher ban shim ia ka rai.
Katei ka Association ka pynpaw ia ka jingsngew bynniaw ia ka jingpyrshang jong ki katto katne ban theh umpjah ia ka jingtreikam ka AMSSASTA kaba la mih ruh ha ki lad pathai khubor ha kine ki sngi bala dep, watla katta ruh katei ka Association ka la ong ba kan iai trei shitom kan nym pynsngap ia kum kita, hynrei ka ieh ha ki para nonghikai SSA hi ba kin bishar la ka long ha kano kano ka rukom ruh. Ka AMSSASTA sengkmie ka la ai khublei kristmas basuk bad snem thymmai bakmen ia baroh ki para nonghikai khamtam eh ia ki para nonghikai SSA ha ka jylla.