U 2015 dei u snem uba la bam bun ki mynsiem jong ki heh ki haiñ

Shillong, 20 Nohprah:
Tang 10 sngi duna ba un sa kut noh, u ne u 2015 u dei u snem uba la bam bun ki mynsiem jong ki riew heh riew haiñ ha kane ka jylla, kham ñiar kum une u 2015 ban shem haba ia nujor ia ka jingiap jong ki heh ki haiñ ha kiwei pat ki snem kata haba ia khein tang ia ka shisnem.
Katba lah ban kynmaw tang ia ki riew saiñpyrthei ka jingiap jong ki heh ki haiñ mynta u snem ka la sdang da ka jingiap jong u MLA ka Chokpot u Clifford Marak ha ka 1 tarik u lber, nangta bud sa u bah Ripple Kyndiah, MP barim ka Lok Sabha uba la khlad noh ha ka 26 tarik u lber. Hadien kata bud sa ka jingiap jong u MDC barim ka KHADC u bah Carmel Sohtun ha ka 6 tarik u iaiong. Hadien kata ha ka 26 tarik u nailur iap sa u bah Hopingstone Lyngdoh, MLA ka Nongstoiñ uba dei ruh u khliehduh ka HSPDP, ha ka 20 tarik u risaw iap sa u bah Marbok Kharpran, MDC barim ka KHADC, ha ka 22 tarik u risaw iap u bah Tylli Kyndiah, MLA barim ha ri Lum Jaintia bad ha ka 10 tarik u naiwieng iap u bah Founderstrong Cajee MLA bad MDC barim ka Mawlai.
Nalor ki riew saiñpyrthei u 2015 u la bam ruh ia kiba bun ki riew pawkhmat ha kane ka jylla ba kynthup naduh ki Rangbah Shnong, Rangbah Seng Khasi, ki Pastor, ki sister, ki Katekist, ki Tymmenbasan, ki riew ia said Aiñ. U 2015 u la bam ruh ia uwei na ka kynhun ki nongthohkhubor kata u bah Kenny Warjri u nongring dur ka PCN uba la khlad noh hadien ka jingjia Aksiden ha ka 11 tarik u risaw.