“Donkam ban kyntiew ia baroh ki tamasa ban khring ia ki nongjngohkai pyrthei”

Shillong, 17 Nohprah:
U Myntri Rangbah ka jylla u Dr.Mukul Sangma u la ong ba donkam ban kyntiew ia baroh ki jait tamasa kiba don ha kane ka jylla khnang ban lah ban khring ia ki nongjngohkai pyrthei na kylleng ki jaka bad khamtam ban kyntiew ia ka kam jngohkai pyrthei. “Ngi donkam ban kyntiew ia baroh ki jait tamasa ha kane ka jylla ngi hap ban pyniaid iew ia ka jinglong tynrai jong ngi bad ka rukom im ki briew jong ngi kiba kham niar ban shem ba kiwei kin riew spah ha kijinglong tynrai, ngin khring ia ka pyrthei bad ngin kyntiew ia ka ioh ka kot ha ka jylla ba ki paidbah kin myntoi” ong u myntri Rangbah ha kawei na ki tamasa ba u la plie paidbah ha ka sngi balang ha Ampati.
U Dr.Mukul u la ong ba ki tamasa kin ailad ia kipaidbah ba kin pyni ia ka jinglong tynrai jong ki la ha ka shad, ka riam ka beit, ka put ka tem bad kiwei pat bad kawei pat kaba ai jingmyntoi ka long ba haba ki paidbah ki wan ban pyni nam ia ki tiar ki tar jong ki kan pynmyntoi ia ki naba kin don bun ki nongthied ki bym pat ju iohi ia kiba kum kitei ki jait tiar hyndai.
Lah ban kdew ba ha ka sngi balang jong ka taiew ki la don lai tylli ki tamasa ha ki lai tylli ki district ka Garo Hills kata ha Ampati – South West Garo Hills, Resubelpara -North Garo Hills bad ha Tasek – East Garo Hills. Katei ka tamasa tlang ha Garo hills ka don la ka jong ka jong ka kyrteng ba ki la buh kum ka Dimchrang bad tamasa kot kudi kaba la leh ha Ampati, ka . A‘we Festival ha Resubelpara, ha East Garo Hills pat ka Tasek Festival.