Bteng ka jingiap Dohkha ha wah Lukha

Jowai, 17 Nohprah:
Ka jingiap ki dohkha ha wah Lukha ha East Jaintia Hills ka dang iaibteng haduh kine ki sngi na ka daw ka jing kylla rong blue katei ka wah kaba la kynnoh ba dei na u dewiong bad ki Kharkhana dewbilat.
Hadien ka jingiap ki katto katne ki dohkha ha u bnai ba la dep, ha kane ka taiew pat, ka la jia ka jingiap ki dohkha naduh ka miet sngi Nyngkong bad ki paidbah jong ka thain Sunapur ki la iohi ba da ki spah spah tylli ki la per ha sla um bad mar syniohi ia kane, ki paidbah nongshong shnong ki la hiar shatei ka wah ban ia jied dohkha.
Ka khubor na katei ka thain ka la iathuh ba ki dohkha ki la per ha sla um bad iap ha baroh shi lynter ka wah.
Ha u bnai ba la dep, na ka liang ki heh bad Engineer ka MSPCB na Shillong ha ryngkat u Magistor na Khliehriat  ki la hiar ban jurip bad ban tohkit halor katei ka jingkylla rong ka wah Lukha kaba la sdang nyngkong eh u snem 2007.
Kitei ki heh MSPCB ki la rah ruh ia ka um na katei ka wah ban test hynrei haduh mynta ym pat shym la tip ia ka jinglap jong ki na kaei ka daw kaba la pynlong ia katei ka wah ban kylla rong bad ban pyniap ia ki dohkha.