Shimti U Todi kum U AG ba thymmai

Shillong, 17 Nohprah:
U   Advocate General ba thymmai jong ka jylla u Dr BP Todi mynta ka sngi u la shimti ia katei ka kam. La pdiang burom ia u Todi da ki ophisar bad ki nongtrei ka tnad Aiñ ka jylla ha ryngkat ka jingiadonlang u bah GS Massar u nongiasaid aiñ ba la kham rangbah, u bah WHD Syngkon Addl. Advocate General bad u L.M Sangma u Special Secretary ka tnad Aiñ ka jylla. La kyntiew kyrdan ia u Todi na u Addl Advocate General, sha u Advocate General hadien ka jingrisaiñ noh jong u Advocate General barim ka jylla u bah KS kynjing shi taiew mynshuwa. Na ka liang ka tnad aiñ ka sorkar ka la pdiang hun baroh ia ka kyrteng u Todi hynrie ka shithi risaiñ u bah Kynjing pat ka sorkar ka dang phah sha u Lat ka jylla. U bah Kynjing u la risaiñ noh na katei ka kam hadien ba la mih ka jingwohdaw kaba la kynnoh ba um ler ban shakri kum u AG hapoh High Court.