“Na kata ka daw I pa I pan bor ban shu pyniap”

Shillong,
5 Jylliew:
U Khun Rangbah ba nyngkong eh jong u Rahim u Mustafa Ahmed ha ka jingiakynduh kaba mar khmat bad u Rupang u la iathuh ba ka daw kaba kong san eh kaba la pyn long ia u kpa jong u ban pan bor na ka Kashari ban pyniap ialade bad la ki khun ka dei namarba ka ing ka sem jong u kam don eiei shuh namarba u kpa jong u u la lilam lut ia ki jingdon jingem baroh naduh ki dukan ki jaka puta bad kiwei. “Kaei kaba ngi don mynta dei sa tang ka ing ba ngi shong, bad ka dukan shna juti kaba la shu khang tala sah haduh mynta” ong u Hynmen ki lai ngut ki khun jong u Rahim kiba la ioh ia ka jingpang kaba lut ksan bha ban phah sumar.
Ha ka ing ba u Rahim u shong u sah ha Barapathar ym shym la don mano mano ruh ha kine ki khyndiat sngi bad ha ka jingpyrshang ban leit ia kynduh ia u Rahim ha katei ka jaka sah jong u, u Rupang u la lap ba u don tang u khun jong u uba trei shna juti. Haba la kylli bniah na u Ahmed ia ka jingpang ba ki para jong u ki la ioh ha ryngkat ki ummat kiba lang ha ki khmat jong u u la ong ba la kumba san snem eiei ki para jong u ki la ngat ha kane ka jingpang bad la phah sumar ia ki ha kawei ka hospital kaba don ha Bangaigoan Guwahati ha kaba katei ka hospital ha kaba nyngkong ka la kular ban ym shim pisa bad ban shu ai ei ia ka snam hynrei hadien ka jingaisnam kaba ar ne lai sien katei ka hospital ka la ong ha u Rahim ba la duna snam palat hapoh ka hospital(Blood Bank) kumta ki hap ban shu thied noh. Tang na ka bynta ban ioh ia ka jingkoit na ka jingpang kaba la ban jur ka ing hi baroh kawei ka la pyrkhat ba katba dang don pisa ban sumar beit, ong u Ahmed da kaba iathuh ba wat hadien ba la bynda lut kat kiba ki don ruh ki para jong u kim pat shym la koit satia. U la ong ruh ba katba dang sumar ha Guwahati ki la pyrshang ruh ban phah sumar teng ha Velore.
Nalor ka jinglut kaba haduh T.45 hajar tyngka manla u bnai, u Ahmed u la iathuh ruh ba donkam pat sa T.90 hajar tyngka na ka bynta ban puid ia ki. U ahmed u la ong ba ki lain gut ki para jong u kiba la ioh ia kane ka jingpang ki u khun ba ar, lai bad uba san jong u kpa jong u.
Watla um shym la ioh khubor eiei ia ka jinglong jingman ki para jong u ha hospital ha Guwahati u Ahmed u la ong pat ba u kpa jong u u la pyrshang ban wad ia ki lad jingiarap na ki bor sorkar ha kaba u la iathuh ruh ba lyngba ki khubor u la iohi ba u Tarun Gogoi Myntri Rangbah ka Assam u la pyrshang ban iarap ia ki.