Nang pynkhlain ia ka UDP ha Mawkyrwat

Shillong, 15 Nohprah:
Ka United Democratic party (UDP) Maw kyrwat Circle dangshen ka la pynlong ia ka Executive Committee (EC) bad ha kane ka jingialang la lap ba ka UDP ha Maw kyrwat ka dang rhem bad ka dangkhlain bad ha kane ka jingialang la shim ruh ia ka rai ban nang pyn khlain shuh shuh ia ka party.
Katkum ka kyroh khubor ba la phah da u bah Commander Shang pliang Chairman jong ka committee kaba kyrpang ka ban peit halor ki ishu bapher bapher kiba ktah ia ka dong ka thain, u la iathuh ba, ia kane ka jingialang la pyniaid da u President bah TK Lyngdoh bad na ka liang jong u President u la pynpaw ia ka jingsngew kmen bad ioh mynsiem ban iohi ia kiba bun ki riew rangbah kiba la wan ban iashim bynta ha kane ka jingialang jong ka EC.
Ka jingkren ioh mynsiem jong u President ha kane ka jingialang ka long namar bun ki riew rangbah ki la wan ha kane ka jingialang bad ki la pynpaw ruh ia ka jing angnud ban nang pynkhlain shuh shuh ia ka party ban pynthikna ia ka jingjop ha ka ilekshon 2018.
Nalor ka rai ban pynkhlain ia ka party, ha kane ka jingialang la shim ruh ia ka rai ban pyn thymmai noh ia ka rukom treikam da kaba peit ia ki ishu kiba ktah ia ka dong ka thain baroh kawei.