Ioh sanad Myntri u bah Boldness

Shillong, 9 Nohprah:
Ha ka 7 tarik u nohprah U Syiem ka Hima Nongkhlaw U Pa’iem Phrestar Manik Syiem U la ai ia ka Sanad ha U Bah Boldness L. Nongum ban long U Myntri ka Hima na ka kur Lyngdoh Nongum ban mih bujli ha ka jaka U Bah Bingshonroy ba la khlad.
Ia U Bah Boldness la jied da ka Kur naduh ka 14 tarik u lber, 2015 ha ka Dorbar Kur kaba la long ha Nongum. Hynrei namar ba don ki katto katne ki Kur kiba pynwit ia kane ka kam la hap ban pynlong biang ia ka jingiajied ha ka 18 tarik u nailar, 2015 ha Ophis u Syiem ha Mairang ha ka jingiadon ryngkat ki nongpeit pyrman na ka KHADC bad nongmih khmat na ka Hima ba la mihkhmat da U Syiem Khynnah bad ki Myntri.
Ha kane ka jingiajied U Bah Boldness u la jop don burom biang, Ka OphisU Syiem ka la phah ia ka kyrteng U Bah Boldness sha ka District Council ban ioh ia ka jingmynjur bad U Syiem hadien ba la ioh ia ka jingmynjur na ka District Council kumba dei ka rukom u la ai ia ka Sanad ha U Bah Boldness ha katei ka sngi ryngkat ka jingkyntu kynpham na ka liang jong U kum U Syiem ia U Myntri ba thymmai. Ha ka jingialang kaba la long hapoh office U Syiem la iadonlang ki Myntri, Raangbah Kur, Ki Sordar bad ki samla pule ban ia sakhi lang ia katei ka sngi.