“Kular U Lat ka jylla ban ai Khrismas ne Newyear da ka VAB”

Jowai, 7 Nohprah: U Chairman ka JHADC u la ong ba u Lat ka jylla u V. Shanmuganathan u la kular ban ai ai sngewbha Khrismas lane snem thymmai ia ki paidbah ka ri Khasi bad Jaintia da ka Village Administration Bill – lane ka ain ban pynkup bor ia ki nongsynshar shnong, Elaka bad hima.
U ma Laitsing Shylla, JHADC Chairman u la iathuh ba ia kane ka jingkular u Lat ka jylla u la kular ia ki ha ka 3 tarik une u bnai ha ka jingiakynduh jong u Chairman ha ryngkat ki Officer ka JHADC nalor u Adviser u ma BG Ladia hadien ka jingiakren kaba la neh kumba ar kynta eiei.
U ma Laitsing u la iathuh ba ha katei ka jingiakynduh ia u lat, la iadonlang ruh u MS Rout, Commissioner Secretary bad u Rever Wahlang uba dei u Ambasador ka India Foreign Service uba la shong thait.
Shwa kane ka jingiakynduh, na ka liang u ma Shylla u la iathuh ruh ba ha ka 19 tarik u bnai ba la dep, ki nongialam ka JHADC ha ryngkat ka jingiadonlang u ma Justine Dkhar MLA, u ma Stephan Mukhim MLA bad ma Sniawbhalang Dhar Myntri PWD ki la dep ban ia kynduh ia u Lat ka jylla halor ka juh ka kam na ka bynta ban mynjur noh ia ka VAB.