Iakynduh DC ka KSU,HNYF ia ka jingsam rashon card

Nongpoh, 07 Nohprah:
Da ka jingsngew khia halor ka jingthurmur jong ki bor distrik kiba dei peit ia ka kam supply hapoh ka distrik ha kaba iadei bad ka jingkhein jingdiah ia ki nongioh bynta bad ka jingsam ia ka rashon card, ha kaba la lap ba bun na kitei kidei ki bar jylla, na ka liang ka KSU, North Khasi Hills District (NKHD) lem bad ka HNYF Northern Region (NR), ki la dawa na ki bor distrik ba kim dei ban sam ia kitei ki rashon card katba kim pat lah ban pynbeit ne ban ai ia katei ka card sha kiba dei hok ban ioh.
Kum ban shu pynkynmaw ba ha ka sngi Saitjain jong ka taiew ba la dep, ki nongialam jong ka KSU bad HNYF ki la leit ban pynsangeh ia ka jingsam ia ki rashon card sha kito kiba deihok ban ioh ha kaban ioh ia kane ka card kaba la long ha Sajer Community Hall, hadien ba bun na ki nongioh ia kitei ka rashon card kidei ki bar jylla, hynrei bun ki longing kiba duk dang hap hapoh ka BPL, kiba dei hok ban ioh kim shem la ioh bynta satia.
Ha ka jingleit iakynduh jong ki nongialam ka KSU, NKHD bad ki nongialam ka HNYF, RB, hapoh ka jingialam jong u samla Ferdynald Kharkamni president KSU bad u Bah Marcus Marten president HNYF ia ka DC Ri Bhoi ka Dr. Pooja Pandey hynne ka sngi, ki la ioh jingtip ba ia kane ka jingsam ia ki ration card sha kito kiba deihok ban ioh la leh lyngba ka cencus ha u 2011 ia kaba la leh da ka Community & Rural Development Under National Food Security Act. 2011.
Hynrei kaba sngewkhia bad kaba pynkhtang mynsiem ia kine ki ar seng, ka long ba bun na ki nongioh bynta ha kane ka jingioh ia ka ration card ki dei ki bar jylla bad ki bym dei hok ban ioh katba kito ki trai khasi khara bad ki trai ri trai muluk kiba dei hok ban ioh kim la paw kyrteng satia, ha kaba na ka liang jong kine ki ar-seng ki la pynpaw ba kin iai pyrshah beit tad haduh ban da ioh ia ka jingpynbeit thymmai.
Ha kaba iadei bad kane na ka liang ki nongialam jong kine ki ar-seng ki la ong, ba kine ki ar seng ki la dawa ia ka hok jong ki para khasi khara kiba deihok ban ioh ia la ka bhah hashwa ba ki bar jylla lane kito ki nongshnong wai kiba shipor ki dei ban ioh, bad ruh shen kin sa leit ban ia kynduh ia ki bor bahalor jong ka sorkar jylla ban ia tai halor ka jingbymioh bynta kiba dei hok ban ioh bad lada ia kane ka jingsam ia ki ration card kan nang iaid shakhmat khlem da lah ban pynshisha ia ki nongioh bynta na ka liang kine ki ar seng kim banse ban shim pat ia ki lad kiba tyngeh pyrshah ia ki bor sorkar.