Shillong:U Dr Sudeepta Kr Swain, uba dei u doktor rangbah jong ka Apollo Hospital,Chennai, uba la pyntbit kyrpang ban sumar ia ka Surgical Gastroenterologist, ula iakynduh ia ki nongthoh khubor mynhynnin ka sngi ha Apollo Trinity Medical Centre, kaba don ha Lower Nongrim Hills, Shillong.
U Dr Sudeepta, u iathuh ba ka jingwan iuhkjat jongu sha Shillong, ka long namar ba ki don ki nongpang, kiba shah sumar ha Chennai bad kiba dei pat ban buddien na ka por sha ka por, halor ka jinglong jong ka koit ka khiah jongki, namar ba kine ki nongpang, kim lah ban leit ban wan sha Chennai, namar ba ka long ka nongbah kaba jngai bad ha kaba ka leit ka wan ruh ka remdor shibun bad kumta u ong ba ki doktor na Chennai, ki wan sha Shillong, man la ka ar bnai, ban ai jingmut ia ki nongpang, kiba shah sumar. Ym tang katta, hynrei, u iathuh ruh ba ki ai ruh ia ka jingsumar ia kito ki nongpang kiba dang shah sumar thymmai bad ula ong “Mynta ka sngi, nga iakynduh ia kawei ka nongpang, kaba la leit shah sumar kylleng kylleng, hynrei kam shym ioh ia ka jingsumar kaba biang bad kum ia kitei ki nongpang, ngi lah ban ai jingmut” ha kaba u iathuh, ba ia ki jingsumar kiba lah ban leh ha katei ka shnat kaba don ha Shillong, kin leh ia kata, hynrei ia ka bym lah, kin leh ha Chennai lane ia kito ki bym lah ban leit sha katei ka nongbah ruh, kin lah ban iasyllok lyngba ka jingiakren na Shillong lane da ka video conference bad ki nongpang.
U Dr Sudeepta, u iathuh ba ka jingpang bampong, ka ju jia ha ki briew, ba ki la bam than ia ka doh, bad nangta ka jingma kaba khraw, ka long ba ki don ki briew kiba dih kyiad ba ka dih sikret ha kajuh ka por, kumta katei ka dei ka bih kaba sniew tam bad kaba kiew haduh shiphew shah ia u briew, hynrei ula ong pat, ba ka jingbam doh bun bad sa ka jingdih sikret, ka lah ban dei, namar ba kane ka jaka ka dei kaba khriat.
U Dr Sudeepta, u iathuh ruh ba katei ka hospital, ka don ia ki doktor kiba na Shillong, kiba sumar ia ki nongpang ha katei ka Centre ha Shillong, hynrei ia kiwei pat ki nongpang, kiba kham jur, kumta ki dei ban leit shah sumar sha Chennai bad u iathuh ruh ba ka jingpynkhreh, ka dang iaid shakhmat, na ka bynta ban plie ia ka hospital jong ka Appollo, ha kaba ka jingwad jaka, ka la nang iaid shakhmat ha New Shillong, na ka bynta ban tei ia katei ka hospital thymmai.
Ha kawei pat ka liang, U Debapriya Deb, uba dei U Chief Executive Officer (CEO) jong katei ka hospital, u iathuh ba katei ka hospital, ka plie ia ki nongpang kiba wan shah sumar man ka sngi, naduh ka por 8baje mynstep, haduh ka por 8baje mynmiet, ba kynthup ruh ia ka sngi U Blei, ha kaba ki plie naduh ka por 9baje mynstep haduh 5 baje janmiet. U Deb, u iathuh ruh, ba katei ka hospital, kan lah ban sa treikam pura, ha ki ar snem ban sa wan, ynda haba kin lah ban trei pyndep ia ka jingtei jong ka hospital, ha ka jaka kaba ki dang pynkhreh ha New Shillong.
Phi don ban ong eiei?