Shillong:U Dr. Mukul Sangma, nongialam liangpyrshah ula weng noh ia ka mat ban shim kum ka rai hapoh ka iing dorbar ban pyllong ia ka Tura kum ka Winter Capital hadien ba la ioh ia ka jingpynshai na u myntri rangbah u Conrad K Sangma.
Haba jubab halor kane, u myntri rangbah ka jylla u Conrad K Sangma ula ong ba ka sorkar kan thaw ia ka Committee ban don lang baroh ki seng sain pyrthei, ki sengbhalang ban iasyllok halor ka jingdawa ban pyllong ia ka Tura kum ka Winter Capital.
U Conrad ula ong ba kane ka Committee kan iasyllok bad pan jingmut na ki paidbah. U la ong ba ka jingmut ka Winter Capital ka long ban don ka jaka treikam, ban pyllong dorbar tlang. Ha kajuh ka por, ka sorkar kan tei ia ka Administrative Complex kaban lut T.170 klur ha Tura bad ha kiwei ki jaka kum ha Jowai.
Ha kajuh ka por, u la ong ba ula ioh pdiang ia kane na ki kynhun bapher bapher na Garo Hills ha kaba ula iakynduh ruh ia ki. U la ong ba ka sorkar ka la pyllong ia ka cabinet ha kylleng ki jaka ka jylla shi bynta ban wanrah ia ka jinglong kawei ha ka jylla.
Katkum ka jingong u myntri rangbah, kaba donkam ka long ban pyntyllun ia ki kam pynroi sha baroh ki bynta ka jylla khlem kano kano ka jingleh shiliang. U la ong ba kaba donkam ka long ban wanrah ia ki kam pynroi shajan ki paidbah khnang ban lait na ka jingsngew khunswet jong ki paidbah.
U Conrad u la ong ba kam long kaba suk ban shu pdiang hynrei ka sorkar kan eksamin ia kane ha kaba un thaw ia ka Committee ban iasyllok shwa bad ki paidbah ka jylla halor kane. Ula kyntu ia u Dr. Mukul uba wanrah ia kane ka rai, ba un weng noh namar ba ka sorkar kan sa eksamin.
Phi don ban ong eiei?