Mana ban ieng kulmar, lait tang ha pyrshah ka SBI Bank, ong u Prassad

Shillong:U Superintendent of police Traffic, ka East Khasi District, u K. Prasad, u la kyntait ia ka jingkynnoh ki nongialam ka All Khasi Meghalaya Tourist Taxi Association (AKMTTA) ba don ka jingleh shilliang na ka liang ki Police Traffic kiba ailad tang ia ki kali kamai tourist na Assam ban ieng ha khyndailad, da kaba kdew ba ki pulit ki leh ia la ka kamram, namar ba ki nongniah kali ki pynieng ia ki kali ha ki jaka ba la mana ban pynieng.

Lah ban kdew hangne ba na ka liang u President ka AKMTTA u bah Ricaldinus Dohling, ha ka 5 Tarik Lber 2025 u la leit ban ujor hakhmat SP Traffic halor ka jingkynnoh leh shiliang ki pulit pyniaid kali ba ki shah ia ki kali Assam ban ieng katba mon ha khyndailad katba ia ki kali na ka Jylla pat kim shah. Haba kren bad ki lad pathai khubor U K Prasad u la ong ba ka jingkynnoh ka AKMTTA ka long ka bym don nongrim namar ba ki pulit ki leh ia ka kamram ban weng ia ka jingdheng kali ha Sor Shillong bad la mana ban pynieng kali hajan ka Cityhut Dhaba bad hajan Vivanta Hotel. “Ha u snem ba la dep ka tnad ka la lum ia ka jingialang hapoh ka jingpyniaid u Deputy Commissioner Transport, ha ryngkat bad baroh ki kynhun Jong ki nongniah kali Tourist, ha Police Reserve ha kaba da ka jingiamynjur lang la rai ban shah ban pynieng ia ki kali kamai tourist tang ha ka jaka ba don marpyrshah ka SBI Bank” u la ong. U la bynrap “Kane ka jaka ka dei kaba lah lah ban pynieng kumba 35- 40 tylli ki kali kamai Tourist bad ym shah ban pynieng kali ha Khayndailad ne ha kino kino ki jaka ba marjan ka Khyndailad bad la rai ruh ban shah ia ki kali kamai tourist ba kin pynieng ia ki kali Jong ki ha Khyndailad tang haduh ka 7 baje bad hadien ka 7:30 ngim shah shuh ia ki ban ieng hakane ka jaka”.

U la iathuh ba kaba jia mynta ka long ba kine ki kali kiba mih na Khyndailad pat ki leit ban pynieng ia ki kali jong ki sha ki jaka ba markhap ka Khyndailad bad kaba donkam hangne ban kdew ruh ka long ba ki don ki dalal ki ba pynbeit hi ia ki jaka ieng jong kine ki kali wat la ki dei ki jaka ba la mana ban ym ieng kali. “Kum ba ngi tip ba ka jingdheng kali ha ka Sorkar Shillong ka la long kaba jur bha bad Kum shibynta ban kham pynduna ia kane, ngi hap ban pyntreikam da ka aiñ bad ia kane hi ba ki pulit pyniaid kali ki leh.Ka tnad pulit pyniaid kali kim lah ban leh shiliang iano iano ruh, ha kaba ki hap ban leh ia ki kamram da ki dei mano mano ruh” u la ong . U Prasad u la iathuh ba ha kaba iadei ban weng ia ki jingeh ki nongniah kali na ka liang ka Sorkar ka la dep ban ithuh ia ki 7 tylli ki jaka ha baroh kawei ka sor Shillong, hapoh ka jingialam ka Additional District Magistrate bad ka jingiatreilang ka tnad PWD bad ka kamram Jong ki ka long ban pynduna ia ka jingdheng kali, ban pynbiang ia ki jaka pynieng kali bad kiwei kiwei ki jingeh ban lah ban tem ia ka jingdheng kali.