Ka VPP kam pyrshah lynti rel, lada don ki ain ban khang ia ka jingrung briew

Shillong:U MLA ka Mawlai u bah Brightstarwell Marbaniang ula ong ba ka seng Voice of the People Party (VPP) kam shym la pyrshah ia ka jingwanrah ia ka lynti rel lada ki don shwa ki ain ban tehlakam ia ka jingwan rung ki briew sha ka jylla.

Haba wanrah ia ka jingiathir hapoh ka iing dorbar mynta ka sngi, u bah Brightstarwell u la ong ba kiwei ki jylla kum ka Nagaland, Mizoram ki don ka Inner Line Permit (ILP) ban tehlakam ia ka jingwan rung ki briew nabar bad hangne ha Meghalaya ka sorkar ka dei ban wanrah ia ki ain ban khang ia kiba nabar shwa ban wanrah ia ka lynti rel.

Ha kajuh ka por, u MLA ka Mawlai ula pyrshah jur ia ka jingkren u myntri sorkar u bah Kyrmen Shylla kumba la paw ha ki lad pathai khubor, ba ki briew kiba nabar kim dei ban tuklar halor ka jingwanrah ia ka lynti rel sha Jaintia Hills hynrei dei ban tuklar hi tang ki briew katei ka thain. U la ong ba ka jaitbynriew ka dei kajuh naduh Pnar, War, Bhoi, Khynriam, Maram, Lyngam bad ym dei ban wanrah ka jingiapait.
U la ong ba ka jylla ka donkam ia ki kam pynroi hynrei ym ban ailad ia kiba wan tuid ban tap bad knieh ia ki hok ki trai shnong.
Haba bynrap halor kane, u bah Ardent M Basaiawmoit u MLA ka Nongkrem, u la ong ba ka jingkren u myntri ka lah lehse ban dei ba btuid u thylliej, bad ula pule ia ki jait kiba dei na Jaintia Hills bad na Khasi Hills kiba dei na kajuh ka thymmei bad kim lah ban iashongkha. U la ong ba kane ka dei ka jingkren u myntri ka lah ban long pynban kum ka jingsngew iapher kum ka jaitbynriew Khasi.
Kumjuh u MLA ka North Shillong bah Adelbert Nongrum uba kyrshan ia kane ka mat ba la wanrah u MLA ka Mawlai, u la kyntu ia u bah Kyrmen Shylla ba u dei ban shu panmab shi kyntien halor ka jingkren jong u.