Nongpoh, 04 Lber: Ha ka jingleit khynra da ki briew ka tnat Excie ha Ri Bhoi, ia kawei ka jaka ba la suba ba ka shna bad pynmih ia ka kyiad phareng beain, ki briew ka tnat Excise ki la ioh ban kurup haduh 25 hajar tylli ka kyiad phareng ba duna dor ba long beain, ia kaba la thep bha bad kaba la thmu ban die pat sha ki nongdih kyiad.
Haba batai halor katei ka jingjia, u Bah R.C Lyngdoh, Superintendent ka tnat Excise, u la ong ba katei ka jingleit khynra, ka dei mynha ka Sngi u Blei ha ka por 1:30 baje eiei noh phaisngi, ha kaba u la ong ba ka daw kaba la pynlong ia ki briew ka tnat Excise na Ri Bhoi, ba leit khynra ha katei ka jaka, ka dei hadien ba ki la ioh jingtip bad ka jingiatreilang lem bad ki briew ka tnat Excise na ka jylla Assam, ha kaba kata ka dei ruh hadien ba ki briew ka tnat Excise na Assam, ki la ioh ban bat ia kawei ka trok kaba kit ia ki kot ban tah ne ai kyrteng ia ki kyaid bapher bapher.
Haba ki briew ka tnat Excise na Assam, ka la ioh ban bat ia katei ka trok, ki la pyntip sha ka tnat Excise ha Meghalaya bad haba kumta, ka la don ka jingiatreilang bad kiba la pynlong ia katei ka jingleit khynra, kaba la pynlong ba kin jingleit khynra lang, tad haduh ba kin da ioh ban kurup ia kitei ki bilor ba la thep kyiad lem bad kiwei ki tiar ki tar kiba la pyndonkam ha ka ban shna ne pynmih ia ka kyaid beain.
Shuh shuh la iathuh ruh, ba na kitei ki 25 hajar tylli ki bilor ba la thep ia ka kyiad phareng, ki kynthup ia ka Royal Stag, Officer’s Choice, OC Blue bad McDowell’s No.1, ia kaba katkum ka dor ha ki Wine Store ne ki dukan die Kyaid, kitei ki kyaid ki dei kiba kham duna dor bad kiba lah ban ioh paidbah na kito ki dukan die kyaid beain, kiba don ha kylleng ki jaka ha Ri Bhoi.
“Haba iadei bad ia ka jingioh ban kurup ia kitei ki bilor ba la thep kyaid phareng, ngi la pynlong ia ka jingleit jurip lang lem bad ki briew ka tnat Excise na Assam, ha kaba nyngkong ngi la leit ia ka Umiam Industrial Complex, hynrei ym lap eiei, hynrei hadien kata pat ngi la leit sha kawei ka jaka hajan Lad Umroi ban leit sha Shillong By-pass, ka don kawei ka jaka kaba ishankhmat bha bad kumta haba ki la pyntip sha ki Pulit, ki la lap ia katei ka jaka ba la shna beain ia ka kyiad” ong u Bah R.C. Lyngdoh.
Nalor kaba la lap ia kitei ki bilor ba la don kyiad beain, ki briew ka tnat Excise, ki la lap ruh ia shibun ki tiar kiba iadei bad ka kam ban shna beain ia ka Kyaid, ha kaba ki la lap ia ki Blending tags, storage tank, capping machine, production lines, ki flavouring bad colouring agents bad ruh kata ka Counterfeit hologram jong ka Assam bad Meghalaya.
U Bah R.C. Lyngdoh, u la ong ba hadien ka jigngleit khynra bad ba la ioh kurup ia kitei ki sakhi ba ki shna kyiad beaiñ, ki la wad jingtip ruh ia ki briew ba don kti ha kane ka kam kaba kim pat ioh jingtip satia bad ha kawei ka bynta ki dang pynlong ia ka jingtohkit bad lada ki la lap ia ki briew ba don kti kin sa ujor sha ki bor ka aiñ khnang ban pynshitom katkum ki kyndon aiñ hapoh ka District and Session Court, Nongpoh, u la bynrap.
Phi don ban ong eiei?