Shillong 04 Lber: U Bah Bindo M. Lanong u ba dei u wei u nongialam seng sain Hima sima ba la kham rangbah uba la bat teng ruh kum u Chief Executive Members ka District Council ula ong, ba ym tang ka Voice of The People Party ba ioh synshar marwei ha District Council, hynrei kidon ruh kiwei ki seng sain pyrthei naduh mynshwa ka la ju long teng kumne ban synshar marwei, bad mynta la bun bun snem la wan sa kane ka party VPP ban synshar marwei.
Ka jingioh synshar marwei ka seng VPP kadei namar, ba ka latam ia ka mad ba la buh kumba 15 katba ka VPP ka ioh haduh 17 seat.
Ia kane u bah Bindo M. Lanong u la pynpaw haba iakren bad u nongthoh khubor jong u Rupang lyngba ka phone mynta ka janmiet jong ka 04 tarik Lber 2025.
U bah Bindo u la ong, ba lada kine ki MDC ki ba lajop na ka seng VPP kin ym phet mano mano ruh sha kiwei pat ki seng nangne bad nangtai kan nangkhlain shuh shuh, nalor kata ba ka la don lypa haduh 17 ngut ka i shngain bad ban synshar marwei ha District Council.
Ka jingdon bun lypa ka seng VPP ia ki MDC kalong, ba ka synshar khadar bunsien ka neh, ka iaid beit bad ka lait na ki kynrum kynram.
U la ong ruh, ba hato kita ki 17 ngut ki MDC na ka seng VPP kin iaineh beit haduh bakut ne kandon ka jingpra shane shatai, hynrei kumba kalong mynta ka Executive Committee jong kane ka seng thymmai ka la shngainbha bad donkam ban iaid shakhmat.
Haba kylli pat, balei ki paidbah ki ai ka jingkyrshan bhai ia ka VPP, u bah Bindo u la ong, ba ka jingkyrshan ki paidbah kadei beit namar ba ka VPP kadang dei ka seng thymmai bad ka la pynshoh jingmut ia u paidbah ban mon bad ban ailad ia kane seng hapoh District Council.
Kumba ki paidbah ki la ai ka jingshaniah, kane ka seng kadei ban pynpaw kam hapoh District Council bad ban pynshisha ban leh ia kiei kiei ki ba bha kumba ki paidbah ki la kwah, bad lada ki pynikam shisha ban pyniaid, kata ka jingshaniah jong ki paidbah kan dangskhem.
Kumta u bah Bindo kum uwei u ba la rangbah ha kakam sain hima sima, u la ai jingmut ia kane ka seng ba synshar hapoh District Council ba kan treihok, treishitom, pyni ia u soh bad ban pyni kakam ha kaba iadei bad kiei kiei ki nongrim ka District Council ka ieng, halor ka Six Schedule ne ka bynrap ba hynriew.
Phi don ban ong eiei?