Shillong:U myntri ka tnad pule puthi ka jylla u Rakkam A Sangma ula pyntip mynhynnin ka sngi ba un leit aiti ia ka dorkhas ha u myntri rangbah ka jylla u Conrad K Sangma ban wanrah ia ka lynti rel na Mendipathar ka North Garo Hills shaduh Baghmara ka South Garo Hills.
Haba kren sha ki lad pathai khubor mynta ka sngi, u Rakkam u la ong ba un sa kyrpad ia u Myntri Rangbah ban iakren bad ka sorkar India ban pyniaid lynti rel na Mendipathar sha Baghmara shaduh Dhaka, ka Bangladesh khnang ban kyntiew ia ka ioh ka kot jong ka jylla.
U la ong ba shwa ban ioh laitluid ka ri India, ka don ka jingiakhaii pateng kaba jur bha bad ka Dhaka bad lada lah ban wanrah ia ka lynti rel mynta kan kyntiew shuh ia ka kamai kajih bad kan pynsuk ia ka leit ka wan jong ki paidbah.
“Ngan leit aiti dorkhas ha u Myntri Rangbah ban wanrah lynti rel na Guwahati sha Mendipathar kaba la don mynta shaduh Baghmara bad wat shaduh Dhaka, Bangladesh, khnang ban kyntiew ia ka kamai kajih bad ka ioh ka kot jong ki paidbah bad ka jylla”, la ong u Rakkam.
U Rakkam u la ong ba ka ri America ka riew spah namar ba ka don ka lynti syngkien kaba bha bad kumjuh ha kane ka jylla ruh. U la ong ba kan don ka Integrated Check Post ban peitngor ia ki briew kiba rung kiba leit kiba wan khnang ban tehlakam ia ka jingrung beain.
Phi don ban ong eiei?