Shillong 3 Lber : Ka Drug Reduction Elimination and Action Mission (DREAM) ha ka sien ba nyngkong, ka la lum ia ka jingialang bad ki kmie ki kpa Jong ki samla ki ba la ngop ha ka jingdih drug Kum shibynta ban ia syllok, ban ai mynsiem bad ban iakhun pyrshah ia ka jingibein ia ka longing ha ka imlang sahlang.
Haba kren bad ki ladpathai khubor , hadien ba wai kane ka jingialang u Mission Director ka DREAM u bah Francis Kharshiing, u la iathuh ba ka jinglum ka mission ia ki kmie ki kpa , ka long ban ia syllok bad ban ai ka jingkyrshan ia kum kine ki longing , khamtam hakaba ia dei bad ka jingibein kaba ka Mission ka don ka jingthmu ban pynduh pyndam ia kane .
U bah Kharshiing u la iathuh ba hakane ka jingialang la wan shim bynta da ki kmie ki kpa, i Dr Rika Lamare I ba long i counsellor na Manbha Foundation, I ba la ai ka jingkren na ka bynta ban pynkhlain ia ka jingmut jingpyrkhat ki kmie ki kpa.
” Na ka Liang ka sorkar lyngba ka DREAM mission ka kwah ban ai ka jingkyrshan ia kine ki longing.Ka DREAM mission ka sngewthuh ia ka jingjynjar ka jingkotdit , Jong ki kmie kpa ruh na kata ka daw ngi khot ia kane ka jingialang ban ai ka jingkyrshan ia ki khnang ba kin long ki nuksa ia Kiwei pat ki kmie ki kpa ki bym tip shano kin leit ban pan jingiarap , kumta ngi kwah ban pyni ba ka sorkar ka don ban kyrshan ia ki” u la ong .
U la bynrap “Kumba ngi tip ba ka jingkyrni ha u Drug kam dei Kum kawei ka jingpang bad kane kam ktah tang ia u ne ka khynnah hynrei ka ktah jur ia ki longing Jong kito kiba la kyrni ha ka jingdih drug ha ka imlang sahlang “.
U bah Francis Kharshiing u la iathuh ruh ba ka Mission ka ai jingiarap ba pura ruh ia ki Rehabilitation center, da kaba kdew ba ka jingsumar ia ki briew ba la kyrni ha ka jingdihdrug ka dei ka kam kaba jynjar tam .
“Ka jingpyniaid ia ka Rehabilitation center ka dei ka kam ka ba jynjar bha ,namar ki ba thiah pang hangto ki ju pynmih ka jingkulmar na ka jingbym lah ban iaid shah Jong ki , te ka kam ban Pyniaid ia ki Rehabilitation center ka dei ka ba khraw bha” u la ong .
U la bynrap Na ka Liang ka Mission hi kan sa ia jingmut ia ka Sorkar ba kan ai ka jingiatreilang bad baroh ki Rehabilitation center , khang ba kin lah ban trei hok ha ki kam ba ki Don .
U bah Kharshiing u la iathuh ba Kumba ka long mynta don 5 kynhun kiba la wan sha khmat ban seng shuh shuh ia ki Rehabilitation center , namar ki Duna palat ki jaka sumar .
Nalor kane ka DREAM mission kan pynlong bun ki jingialang, kan ai ka jingpynshai paidbah , kan ai ka jinghikai ruh ia ki Village defence Party (VDP ) bad Kiwei Kiwei ki sienjam ba kan shim .Shen ka DREAM mission kan sa khot sa ka jingialang bad ki seng samla ban ia kren ia syllok halor kane ka mat ,bad kane ka mission kan pynbun ruh ki program kiba kan sa pynlong ban ai jingshai halor ka jingma jong u drug bad hapoh ar snem ka Sorkar kan sa pyni ia kaei ba ka la leh ia ki kam ban tehlakam ia u drug ha ka Jylla.
Phi don ban ong eiei?