MAP NOH MEI PA!

S.K.N

[ba bteng] Marsien rung ha iing ka Riia beit beit ka leit sha jingthiah bad ka thiah khop.
Ka Kmie ka la iathuh ha u Kpa shaphang kaba la jia. Bad u kpa ruh u la shu kyrngah khlieh.
“Lah dei beit bad u Bahnah hi. Lada ym bad ito badno …?” La ong u Kpa
“Nga ngeit kumta hi, tangba ap kan da phla shai ka khun…” La ong ka Kmie “
Ka Riia kam nud iathuh namar ba kam pat ioh iakren lypa bad u Bahnah.
Haba la kem dum, la don ba tied iing bad ka Kmie ka Riia ka leit ban plie. Ka iohi ia u Bahnah
“O Bahnah phi la wan.. ?” La ong ka Kmie

“Hooid kein..” La jubab u Bahnah
“O ale ale” la khot u Kpa
Haba ka Riia ka la iohsngew ka la kyndeh ban wan peit; hynrei namar ka jingtlot ka la sngap la ka sngap.
“I Riia shano Mama..?” La kylli u Bahnah
“I don sha jingthiah imat….” La jubab u Kpa
“O balei kein…?” La kylli biang u Bahnah
“Im da khlain…” La jubab u Kpa
“I shu thiah ka mut…!” Kren kyndit u Bahnah
“Hooid, kein…” La phai ktien u Kpa
U Bahnah u la kyndit bad kwah ban leit peit. Hynrei um nud ban shu leit la ka leit hi khlem da ioh bor. Kumta u la pyrkhat bad u la pan bor.

“Long Mama ngan leit peit ia I…?” U la sngap jubab
“Hooid long khie khie leit peit…” La jubab u Kpa
Mar kumta hi wut u Bahnah u la leit. U iohi shisha ba ka thiah.
“Riia balei kein…?” La buh jingkylli u Bahnah
Ka Riia ka la jaw ummat bad leh sngewsih. U Bahnah u la kyndit bad sngew diaw lang. Ha la mynsiem u la suba ba la don kaei kaei kaba pher.
“Riia balei pat phi iam..? La kren u Bahnah da i ktien ba jem.
“Bahnah nga la armet. Ngam sngew khlain shuh.” La iathuh ka Riia
“Kumno kumta, phi la wan doctor ..?” La bniah u Bahnah
“Hooid, nga dang shu wan mynne hi janmiet bad i Mei..” La iathuh ka Riia
U Bahnah u la sngew ktah shi katdei eh la kumba tied u pyrthat. Namar u sngewthuh ba um lah shuh ban buhrieh ia kaei kaba u la leh ia ka Riia.

“Riia haba kumta ngin leh kumno…?” La pan jingmut u Bahnah
“Bahnah yn leh shuh kumno sa tang ban iathuh noh beit ha iing. Lym kumta ngin poi sha kaba eh. Namar i Mei ruh i la dom imat…” La pynpaw ka Riia
“I Mei i ong kumno…?” La kwah tip u Bahnah
“I khlem kren i dom palat tangba i pynpaw ba nga arsap bad dakait pleng…” La jubab ka Riia
“Nga ruh Riia ngam pat iathuh eiei sha iing wat ha i Deisy ruh iba don ha syndah man ka sngi, bapli i khlem bna eiei. Kane te ka la long pap shisha ia ngi. Te haba la shai kumta ngim dei shuh ban dang buhrieh ngin hab ban shu panmab noh mo. Phi wat sngew buhkhoh ngan kit ngan bah ha la i bor kumba la kular ngi la ia bakla lang..” La pynpaw u Bahnah.
“Hooid Bahnah nga la sngew sih palat. Nga synei pynban ia i Mei i Pa, nalor ka jingshaniah tylli jong ki ia nga bad ka jingleh lyndet jong nga ia ki ka la ktah ia ka burom ka iing ka sem bad ia nga ruh…” La pynpaw sa ka Riia.
“To ym lei lei, phi panmap na la i Mei i Pa nga ruh nga hab ban iathuh noh ia i Deisy bad ruh sha iing.” La ong u Bahnah
“Bahnah peit mo ioh phi lehbein ia nga ngan shu kit khunrei ei… Nga la ieid shisha ia phi da ka jingieid ba janai…” La pynpaw biang ka Riia
“Em Riia wat ong kumta ngam long u briew uba kumta. Naduh nyngkong nga la sngewthuh tangba nga la iathuh lypa ha phi ba nga long u briew uba duk eh, nga sheptieng ioh ngam lah pynbiang ia phi kumba phi khmih lynti. ” la phai ktien u Bahnah
“Kam pher Bahnah ia kata, ngan sa kren shai ha i Mei i Pa ruh shaphang jong phi..” La pynpaw ka Riia.
Hamar kata ka por wan mih ka Kmie ka Riia.
“Bahnah dih shuwa ka sha kane nga la theh.” Ka buh artat ar pela ka sha.
“Ani i Mei balei phim ong ngan pynleh ma nga.. Nga sngew lehrain pynban..” La ong u Bahnah
“Em dih ym lei lei. I Riia ruh dih shuwa sa dih dawai pat..” La phai ktien ka Kmie.
U Bahnah u la dap da ka jingsngew lehrain bad sngew babe ia kaei kaba la jia. Hynrei wat katta ruh u tngen namar u iohi ia ka jingjai jai ka Kmie bad u Kpa ka Riia.
“Riia i Mei jong phi i ieid shisha ia phi. Ka donkam ba phin panmab noh na i nga ruh ngan sa leh kumta ynda la dep ma phi bad lada ki suk ngan sa wan sah wan shong noh syndon.” La pynpaw u Bahnah
“To Bahnah, ngan leh noh kumta..” La kohnguh ka Riia
Hadien ba la dep dihsha u Bahnah u ieng ban leit buh bad khlieng syndon baroh ki tiar tngit. Kum u trai iing. Ynda la dep u sa shongkai biang bad u Kpa kumjuh ka Kmie ka Riia.
Dei hangne ba Ki sa iohlad ban iakren ia ka kam kaba jia ha ka khun jong ki. [yn dang bteng]