Shillong:U President ka Voice of the People Party (VPP) u bah Ardent M Basaiawmoit ula ong ba kumba ka paw na ka elekshon MP bad MDC, ki paidbah ka ri Khasi-Jaintia kila pdiang ia ka nongrim jong ka seng.
Ha ka elekshon MDC kaba dang shu dep, ka VPP ka la jop 17 ngut ha KHADC bad 8 ngut sha JAHDC. Ha KHADC ka la synshar marwei katba ha JHADC kan shong ha ka liangpyrshah namar bym kot ia ka jingbun paid.
Haba kren mynhynnin ka sngi, u bah Ardent ula ong ba ka jingioh vote ka VPP ka la kham bun ban ia ka NPP ha kane ka elekshon kumba ka paw. Ha KHADC ka la ioh 37 percent katba ka NPP ka ioh 25 percent katba ha Jaintia Hills ka NPP ka ioh 32 percent katba ka VPP ka ioh 31 percent ka vote bad kane ka pynpaw ba ka VPP ka la kham bun ban ianujor bad ka NPP.
U la ong ba ka jingduna ka jingioh vote bad ka jingjop ka VPP ha JHADC ka dei namar ba ki briew kim ioh lad ban jied laitluid kumba long ha ka elekshon KHADC, ha kaba ka party kaba don ha ka bor ka la pyndonkam da ka bor ban noin ia kiba ialeh pyrshah.
Halor ka jingkren jong u MLA ka North Shillong u bah Adelbert Nongrum ia ka party, u bah Ardent u la ong ba kumba ka paw wat ki paidbah ki shim ba ka jingleh u bah Adelbert ka long pyrshah ia ka party bad ka party kan sa pyrkhat kaei kaba dei ban leh.
Halor ka jingdawa ia ka artikil 371, u la ong ba u la dep wer ban iatainia bad la don ruh kiba la pynpaw ba ki kloi ban iatainia bad yn sa buh ia ka sngi bad ka por halor kane khnang ba ki paidbah kin shai.
Halor ka jingkylli hato lah ban don lang ka District Council bad ka artikil 371, u bah Ardent ula ong hato ki longshwa mynshwa ha ka por ba dawa ia ka jylla, ki tieng ban duh noh ia ka district council.
Phi don ban ong eiei?