Shillong:U nongialam ka liangpyrshah ha iing dorbar thawain uba dei ruh u MLA ka TMC u Dr. Mukul Sangma ula ong ba ka elekshon MDC sha GHADC kan long lashem snem ha u Iaiong lada kam don kano kano ka jingpynkylla.
Haba kren mynta ka sngi, u Dr. Mukul ula ong ba sa peit kaei kaban jia bad kan sa wan ka jingkylla ha ka sain pyrthei ha kane ka elekshon.
Haba kren halor ka jingmih ka result MDC ba dang shu dep ha KHADC bad JHADC, u Dr. Mukul u la ong ba ka Congress kaba ju synshar baroh shi katta, ka iaid thylli ha kane ka kynti bad ki nongialam ki dei ban pyrkhat bha halor kane.
Ula maham ruh ia ka NPP kaba don ha ka bor ba ka jingjop jongka 4 ngut ha KHADC ka long u dak saw ba shyrkhei ia kane ka party kaba la synshar ha ka jylla. U Dr. Mukul ula ong ba kane ka pyni ba ka sur jong u paidbah ka la sawa jam ba ka donkam ia ka jingkylla bad ki samla ki kyang ia ka jingkyrduh kam kyrduh jam.
Ha kajuh ka por, u la ong ba ka jingpynrem kput ki paidbah ia ka NPP ha ka MP elekshon na Tura ka long namar ba ki kwah ban pyndkut noh ia u ksai ba kane ka party ka la synshar tang ka tyngam khlem ki kam.
Phi don ban ong eiei?