Shillong:Ka Meghalaya High Court, mynhynnin ka sngi, ka la pynmih ia ka hukum, ba ka la pynkut noh ia ka mukotduma, kaba la ujor da U bah Adelbert Nongrum, MLA bad katei ka jingmudui, ka dei halor ka jing bym ailad jong u lamphang dorbar ba un leit rah ia ka mat iakren, ha ka 15tarik Rymphang 2025, kaba dei katba kum ka kaiphod jong U Comptroller and Auditor General (CAG) kaba kut ha ka 31tarik Lber 2022 bad katei ka dei halor ka jingpynlut jong ka MeECL, kaba pynlut T.156.14 klur, ha kaba ai kontrak ban pyntrei ia ka skhim Sobhagya.
Ha katei ka dorkhas, u nongmudui, u kynnoh ruh ba u lamphang dorbar, u shah pyniaid ha u myntri rangbah ka jylla bad kumta um shym la shah satia ban leit rah ia katei ka mat iakren hapoh ka iing dorbar jylla, ha kaba u nongmudui u shim ba katei ka dei ka mat kaba donkam bha ban iatai hapoh ka iing dorbar jylla.
Ha ka jingshim bishar, ka kashari, ka pyni, ba katba kum ka artikel 212, ka kashari kam lah satia ban tian bishar halor ka jingiakajia hapdeng u lamphang bad u dkhot ka iing dorbar bad la ong shuh shuh, ba katei ka mat, yn jin da la dei ban leit rah ha ka jingiakren hapoh ka iing, ynda haba ka Public Accounts Committee (PAC) ka la pyndep ia ka jingtohkit jongka, halor katei ka kam.
Halor kitei ki kyndon ba la pyni haneng, la shim namarkata, ba u lamphang dorbar, um shym la leh bakla bad kumta ka kashari, ka la pynkut noh ia ka jingbishar ia katei ka kam.
Ha kawei pat ka jingbishar, ka kashari mynta ka sngi, ka la tohkit, halor ka jingsiew ia ka bai jaka, na bynta ban pynheh ia ka kad liengsuin ha Umroi, ha kaba la kynnoh, ba ka don ka jingsiew tam ia ka pisa sha ki trai jaka bad ka dei halor katei ka mat, ba la bthah ia U District Judge jong ka Ribhoi, ban tohkit halor kane ka jingkynnoh, ha kaba ia ka hukum, la pynmih da ka Supreme Court of India bad ba la bthah ia ka High Court, ba kan phah tohkit bad kumta ka High Court of Meghalaya, ha ka 2tarik Nailar 2017, ka la pynmih ia katei ka hukum ban tohkit bniah halor ka jingsiew pisa.
Na ka jingtohkit, la lap ba ka pisa kaba shongdor T.25,70,80,258 lane kaba long 80 percent, la dep siew sha ki trai jaka bad ka don ka pisa kaba sah sa 20 percent kaba dang dei ban siew sha ki trai jaka bad nalor kata ka don sa ka pisa kaba long T.9klur la dep siew tam, na ka dor kaba dei hok ban die sha ki trai jaka bad halor kane ka High Court, ka la aiti sha ka kashari jong U Session Judge jong ka Ribhoi, ba kan tohkit halor kane ka jingsiew tam kaba T.9klur, la ka long kaba shongnia ne em bad la ai por 3bnai ia ka kashari U Session Judge, ba kan pyndep ia ka jingtohkit bad nangta la bthah ruh ba ia ka pisa kaba sah kaba sa 20 percent, ba ym bit satia ban siew, khlem ka jingmynjur jong ka High Court.
Phi don ban ong eiei?