Shillong: Ki Pulit ka Cachar kila ïoh ban kem ïa 4 ngut ki runar kiba kam ïalade ba ki dei ki lehnoh ka ri Pakistan ban dawa pisa na ki kompeni ba shna ïa ka surok 4-Lane.
Arngut na kine ki runar la ïoh ban kem na East Jaiñtia Hills, Meghalaya da ka jingïarap ki Pulit ka Meghalaya.
Haba kren sha ki lad pathai khubor, u Superintendent of Police ka Cachar Numal Mahatta ula ong ba arngut na kine ki runar ki dei ki nongshong shnong ka Kachudaram katba arngut ki dei na ka thaiñ Katigorah.
U Mahatta ula ïathuh ba ha ka 21 tarik Rymphang, ki Pulit kila ïohpdiang ïa ka jingujor na ka kompeni Jhandu InfratechLtd, kaba pyntrei ïa ka surok Highway ha Cachar District bad mar mar ki Pulit kila pynlong ïa ka jingtohkit bad ka jingkhynra.
“Ka nongujor ka pyntip ba uwei u briew bym lah ban ithuh, uba pynithuh ïalade kumba u dei u dkhot ka Laskar-e-Taiba (LeT), ula phone ïa u nongtrei ka kompeni bad dawa pisa haduh T.10 klur na ka kompeni haba byrngem ruh ban leh tyngeh lada ïa ka pisa ym lah ban siew hapoh ka por ba kila buh,” ong u SP.
Ki Pulit ka Cachar kila register mar mar ïa ka case ha Katogorah Police Station bad ha ka jingtohkit, kila lapdien ïa kine ki 4 ngut kiba donkti ha kane ka kam bad hadien la pynlong ïa ka jingkhynra kaba jur ban ïoh kem ïa ki.
Kine ki briew ba shah kem ki kyrteng u Boktar Hussain u nongïalam, u Sansir Uddin Barbhuiya, Md Alekuddin bad u Ajiruddin ba khot sin u Amiruddin.
Phi don ban ong eiei?