Ka sorkar jylla, ka la shim ia ka lynti kaba biang eh, na ka bynta ban pynkhie im biang ia ki tyllong um ha ka jylla, ha kaba ki don kumba 741 tylli, na kitei ki tyllong um, kiba don ha ka jingtyrkhong kaba jur bad ka jingryngkhiang jong kitei ki tyllong um, kan ktah jubor ia u khun bynriew, ha kaba kan don ka jingduna um kaba jur bha bad katei kan ktah ia ka jingim jong uwei pa uwei u khun bynriew, u bym lah satia ban im wat tang da ki minit, khlem ka um dih kaba biang.
Namar ka jingpynjot pynduh ia ki jaka puta, ia ka khyndew ka shyiap, ia ki lum ki wah bad ki jingtei kiba har har rukom, la iohi, ba ki tyllong um, ki la shah pynjot thiaw bad nangta sa ka jingthang ia ki lum ki wah sha ki nongkyndong, ka jingrep shyrti bad ka jing pynkhyllem ia ki diengbah, ka la nang pynryngkhiang ia ki shnong ki thaw bad kumta, kine ki jingeh kiba ngi sdang ban ia tyngkhuh, ki dei hi, na ka jingleh thawsha u khun bynriew bad la iohi shai bha ia kata, ba wat ki tnat sorkar, ki ju pynkhein ia kitei ki kyndon, ha ka kam shna surok, ha kaba tei ia ki ophis bad wat ha kaba tei ia ki madan ne ki jaka ban pynlong ia ki iew ki hat.
Haba ka sorkar jylla, ka la iaid shakhmat ban pynim biang ia kito ki tyllong um, kumta ka donkam ba kan wad ia ka jingiatreilang jong ki trai jaka, ki bor shnong ne ki bor na ki Raid bad ki Hima ruh kumjuh, khnang ba ka jingpynlang biang ia kitei ki pung kiba la tyrkhong, kan long kaba jop bad ba ka pisa paidbah, kan nym shu lutphut kai ha ki projek ki bym larkam bad katei ka jing pynlang um, ka dei ruh ban pyn myntoi ia kito kiba don hajan kitei ki jaka, kum ha kaba sait jain, ha kaba sum ba sait, ha kaba sam um sha ki bri kwah bri soh bad ha kiba bun kiwei pat ki jingdonkam bapher.
Wei haba ka sorkar jylla, ka la sdang ia ka jingpynkhie im biang ia ki tyllong um lane ia ki umpohliew, kumta ka donkam ruh ba kan sdang noh ban husiar bha ia ka jingpynjot ia kiwei pat kiba dang im bad kane ka projek, kaba dang iaid shakhmat, kam dei ban long tang ha ki jaka sor, hynrei, ka la dei ban iaid shaduh sha ki nongkyndong tam bad kam dei tang katta, ka la dei ruh ba kan nym pynlehnohei shuh ia ka umslap, kaba dei kawei na ki jingkyrkhu jong ka mariang bad lada lah ban pynurlong ia ka jinghap slap, kumta kan long ka jingiarap kaba khraw ka ban kyrsei ia ka mei mariang bad ka ban pynseisoh ia ka rep ka riang bad ka ban long ruh ka jingkyrkhu ia u khun bynriew, ha kiba kum kine ki por jong ka jingstad saian, ha kaba ngi la leh klet noh ia ka jingkyrkhu kaba pyndap pynbiang da U Blei Trai kynrad nongbuh nongthaw.
Phi don ban ong eiei?